Australian Formula 1 driver Daniel Ricciardo chuan McLaren F1 team chhuahsan tumna a nei lova, nakkum thlenga contract a neih chu hman zawh ngei a tum tih a sawi.
Kum 33 mi hian tun season-ah beisei angin McLaren car a khalh thin lova, a teammate Lando Norris chu intlansiak tam zawkah a tluk lo leh thin.
Hei vang hian a hma hunin sawi zui a hlawh phah a. Thla hmasa khan McLaren Racing chief executive Zak Brown chuan an lakluh hnuah an beisei ang result an neih loh thu a lo sawi tawh.
Ricciardo hma hun hi sawi hlawhtir zualtu chu tunkara IndyCar kumin a che tha Colton Herta in nikum a McLaren car khalh a test a neih tur vang a ni pakhat.
Hei chauh hi nilovin McLaren hian kum 2023 atan IndyCar champion Alex Palou an lakluh thu an puang bawk a. Formula E series , IndyCar leh electric off-road Extreme E a team nei British manufacturer hian khawi berah nge a tel dawn an la sawi lo.
Anni pahnih bakah hian tunhnaiah nikuma F2 champion, Alpine reserve ni mek Oscar Piastri bakah tun season a che tha Williams driver Alex Albon leh Sebastian Vettel te sawi lan tel an ni.