Russian missile-in Vinnytsia khawpui laili kap fuhin naupang pathum telin mi 20 vel an thi niin Ukrainian thuneituten an sawi.
Ukraine khawpui ber, Kyiv atanga chhimthlang lama awm khawpui kahnaah hian mi 90 vel hliam tuar an awm bawk nia sawi a ni a. He khawpui hi tuna Russia nena an inbeih mekna hmun atanga hla tak a ni.
Russian missile pathumin pisa atana luah lai fuhin mihring chenna in eng emaw zat a tichhe bawk.
Ukrainian President Volodymyr Zelensky chuan beih an nih dan chu ‘langsar taka firfiaka chetna’ tiin a sawi.
Ukraine-a State Emergency Service chuan missile hian in chhawng kuaa sanga lirthei hunna hmun chu an ram sanaa Ningani chawhma dar 10:50 (India-a chhun dar 1:20)-ah a fuh niin a sawi a. Mi 3,70,000 vel chenna, Vinnytsia khawpui lailia mihring chenna hmun pawh kah fuh a ni tih a sawi bawk.
Vawi tam tak civil mite an kap ngai lo tia lo insawi tawh thin, Russian defence ministry chuan engmah tun tum thil thlengah hian an la sawi lo.
Ukrainian president chuan Kalibr cruise missile hi Black Sea-a tuihnuailawng atanga kah chhuah niin a sawi.
Regional emergency service thuneitu pakhat chuan tual chhung TV hnenah missile-in a fuhna lai bawr atang hi chuan nung dama lak chhuah tur an awm a beiseiawm loh niin a sawi.
“Ni tin Russia-in civil mite an that a, Ukrainian naupang an that a, missile hmangin civil mite hmun, sipai tumah an awm lohna an kap chamchi a. Hetiang hi engnge ni ngai, hei bak hi langsar taka mi firfiak chetna a ni lo em ni?” tiin Zelensky chuan social media-a thuchhuah a siamah a tar lang.
Russia-in Ukrainian civil mite a kap tih sawi a awm mek lai hian EU foreign leh justice minister te chu The Hague-ah Russia-in indonaah dan pelin a che nia puhna sawiho turin an thu dawn mek.
Ukrainian Foreign Minister Dmytro Kuleba chuan tuna Vinnytsia an kah lehna pawh hi dan pela Russia a chetna thar a nih thu a sawi.
“Ukrainian-te thisen leh mittui far zawng zawng hi Russian-ten dan pela an chetna a nihzia thu ngaihtuahnaah pho chhuah a ni ang,” tiin a sawi.