AIZAWL: Zoram People’s Movement (ZPM) working president chuan an party policy chu peih fel a nih tawh thu sawiin, kuthnathawktute chanvo an dah pawimawh ber zinga ami a nih thu a sawi.
ZPM hruaituten Hachhek bial fangin kuhva chingtute nen an inkawm a. He hunah hian thu sawiin K Sapdanga chuan an party mi thiamten leilung, sik leh sa bakah ram bial hawiher an zir atangin policy an duan chu peih fel a ni tawh a, party thuneitu sang pawhin a pawm tawh tih a sawi a. “Kuthnathawktute chanvo (agri & allied sector) hi kan dah pawimawh berte zinga mi a ni,” a ti.
K Sapdanga hian ram thang mekah mipui hmasawnna turin leilung hausakna atanga deh chhuah tihpun a ngai a, chutiang tih theihna chu Mizorama kuthnathawktuten an nei tih a sawi a. ZPM a sorkar chuan a thawkrim apiang an ding chhuak ang tih hi an hotute thurolum a nih thu leh, chu chu party lam ni loin ram dah hmasak pawimawhna a nih thu a sawi.
Dr Vanlalthlana, MLA pawh thu sawiin, “Kuthnathawktute natnaah hian kan na ve a ni. Helaiah hian mipuite kan damlo a, ralkhata damlo intlawh ai chuan a hmuna damlo kan ngei hi Mizo nun dan mawi tak a ni,” a ti a. Dan loa kuhva sumdawnna chungchang pawh an hriat chian zel thu leh, assembly session-ah an aupui tawh tih a sawi a. Dan rorelna fel tungding turin theihtawp an chhuah zel dawn tih a sawi.
ZPM hruaitute hian Hachhek Bial Kuhva Chingtu Pawl (HBKCP) te nen an inkawm bakah, Rengdil, Zamuang leh Kawrthah khuaa kuhva chingtute an inkawm bawk a. Kuhva chingtute chuan an hrawkhrui venga a kawtawpa tang an nih thu te, kuthnathawktu tam zawkin lo neih an bânsan tawh thu te leh an dinhmun enin duhthlan tur dang an neih tawh loh thu te an sawi a ni.
ZPM hruaitute hi Thangkhuma leh Zosangliana, PAC Member te; C Lalthanfela, General Secretary bakah General Headquarters hruaitute leh Hachhek Block hrang hrang hruaituten an tawiawm.