Kum 1985-a Air India thlawhna bomb-tua puh, a hnua thiam chang zui ta chu tum reng vang ni ngeia hriatin Canada-ah kah hlum a ni tih police-in an sawi.
Ripudaman Singh Malik-a hi Surrey, British Columbia-a a car chhungah kah hlum a ni a, a bul lawkah a car hi halin police-in an hmu bawk.
Malik-a hi mi 329 zet thihna mi firfiakte chetnaah khan engmah inrawlh lo angin a insawi a ni.
Kum 2005 khan thlawhna beihnaah hian court chuan inrawlhna nei lo tiin a chhuah zalen a; mahse, police chuan an chhui zui reng tho.
Thlawhna bomb hi Canadian Sikh-te tih ni ngeia hriat a ni a. Kum 1984-a India-a Sikh sakhaw hmun thianghlim ber, Golden Temple luhchilh a nih phuba lak nana an tih nia ngaih niin Canada-ah chuan mi firfiak chetna rapthlak ber a la ni.
Kum hnih chhung zet a thubuai ngaihtuah a nih hnuah Sikh sumdawng, Malik-a leh amah ang bawka he chetnaa tela puh, Ajaib Singh Bagri te chu mi pawng thah leh bomb pahnih tihpuahna tura ruahmantua puhnaah fihlimtir an ni.
Canadian police chuan Malik-ah thah a nih chhan hi chhui mek zel a nih thu an sawi.
Canada atanga India pana thlawk, Air India flight 182 hi Irish tuipui kamah bomb a ni a, a chuang mi 329 chu an thi vek a. A tam zawk hi Canadian khua leh tui, India-a chhungte nei niin June 23, 1985-a thleng a ni.
Hetih hun lai chiah hian Japan-ah bomb a puak bawk a, hei hi tum hun hmaa puak niin bungraw khai kualtu mi pahnih an thi.
Bagri leh Malik te hi thlawhnaa bomb kam dan tur ruahmana a duangtu-ah hian puh an ni.
Mahse, an chungthu ngaihtuahtute chuan thuhretuten an puhnaah finfiahna tha tawk a awm lo va, an puhte inpuanna pawh rintlak tawkah ngaiin thiam loh an chantir ta lo.