Aizawl: Serlui bialtu MLA Lalrinsanga Ralte chuan Mizoram sorkarin ramri hmasawnna atan hma nasa takin a la a, Vairengte-a Aitlang hmuna sipai duty camp-ah pawh electric pawh luh a ni leh tawh tih a sawi.
He thu hi nimina Serlui bial chhunga cheng a mamawhte hnena wheelchair leh bengdar hlanna a pisaa neihah a sawi a, “Nikum khan Buarchepa kan sipai duty-te awmnaah electric current pawh luh tawh niin Aitlang lui rala kan sipai duty post pahnih, Dara huantlang leh Tlangpuiah electric pawh thlen a ni leh ta hi a lawmawmin sorkarin ramri a ngaihsakzia lanna a ni,” a ti.
Ramri hmasawnna atan Mizoram sorkar chuan ruahmanna hrang hrang siamin ramria sipai duty-te awmna tur inte sak thatsakin, in a sak belh mek zel tih a sawi a, ramri humhalhna leh ramri depa awmte hmasawnna atana kawng a laihte chei tha turin sorkar chuan ruahmanna siamin chak takin a bawhzui mek tih a sawi.
Vairengte-ah IR Company Headquarter dah thar a nih thu leh a building pawh a satu tur thlang fel tawhin hna an tan mek tih Serlui MLA chuan a sawi bawk.
Serlui bialtu MLA hian a bial chhung mi a mamawhte hnenah wheelchair pali leh cengdar panga a hlan a, hemi rual hian Kolasib District MJA hnenah press club sak chhunzawmna turin MLA Fund atangin Rs. 2,00,000 a hlan bawk.
MLA Fund chu langtlang taka hmana a bial chhung chhungkaw tin thleng zo ni se a duh thu sawiin, MLA Fund atang hian education tihhmasawnna atan zaa 10 leh health lam tihhmasawnna atan zaa 10 chu dah a nih thin thu a sawi bakah a bial chhunga health clinic centre-a thawktu health worker mi pasarihte chu a MLA Fund atang hian a chhawr mek tih a sawi.