Champhai Bawrhsap James Lalrinchhana’n nimin khan Farkawn khua tlawhin, Vawk hrileng avanga an tawrhnate line department leh bank hotute nen an enfiah a. Dist bankers meeting-ah Vawk vulhtute harsatna thlena sawiho a nih thu a sawi.
Vawk pul hri leng avanga Champhai district-a Vawk thahnem tak a thih phah chu pawi a tih thu sawiin, harsatna tawkte a tawrhpui thu Champhai Bawrhsap chuan a sawi a. Hri leng avanga Vawk a thih tam avanga loan laa Vawk vulhtute harsatna tawh engtinnge buaipui tur tih te ngaihven tura bank hotute leh line department hotute nena Farkawn khua chu tlawh an nih thu a sawi.
Champhai Bawrhsap chuan ramri depa awmte chu ruihhlo leh a kaihhnawih ven kawnga theihtawpa tanhopuiah a sawm a. Hman khat daih polythene-te hmang tawh lo tura tanrual a tul thu pawh sawiin, Covid-19 hluar thar leh laka fimkhur tura inkaihhruaina dan zawm kawngah thahnemngai taka tha thar thawh leh turin mipuite chu a chah bawk.
Veterinary officer Dr. Lalrinhlui'n a sawi danin, April ni 11, 2022 khan Farkawnah ASF hri hmuhchhuah a ni a. Nimin thleng khan Farkawnah Vawk 859 thi tawhin, 1794 suat an ni tawh. Mi 74 ten Vawk vulh loan Rs. nuai 300 chuang an la a ni.
Lead district manager (LDM) Champhai Jyoti Munna Soren pawhin Vawk pul hrileng avanga Vawk chan te chu an loan lak dan kimchang leh rulh dante, loan rulh kawnga harsatna an tawh dante, Vawk vulh zat, a thi leh a la bang leh tuldangte report kimchang siama Bank-a thehlut turin a hrilh a. District level committee hminga State level bankers' committee (SLBC)-a report thehlut a nih tur thu a sawi.