Mizoram Pradesh Congress Committee (MPCC) President Lalsawta chuan, Mara Autonomous District Council (MADC)-a Congress MDC paliin MNF thawhpuia sorkarna an siam chu Congress party thuneitu sang PAC in a rem tih loh thu leh PAC chu an dinna a la ngai reng tih a sawi
Nimin khan Congress Bhavan-ah MADC chungchanga PAC thutlukna puangin July 12, 2022-a PAC thukhawm chuan Displinary Action Committee-in a zirchianna leh tul angte an theh luh an sawi ho thu sawiin, “Mara Autonomous District Council-a Congress MDC paliten Congress kaihhruai sorkar siama MNF an thawhpui hi PAC-in a remtih loh a nih avangin PAC hi hemi chungchanga kan dinna hi a la ngai reng a ni,” Lalsawta’n a ti.
Congress president hian MNF leh BJP hian duh se MDC 21 neiin sorkarna an siam thei reng tih a sawi a, “Kum 2023 General Election thlir ranin an thawk ho duh lo a, Mara mipui dinhmun ngaihtuah miah loin sorkarna an siam duh lo a ni,” a ti a. Congress pawhin nakum inthlan thlirin BJP chu thawhpui chi-ah an ngaih loh thu a sawi.
MNF pawh tuna an hnuhma leh an sorkar that loh em avangin thawhpui chiah an ngaih loh thu Lalsawta hian a sawi a. “Kan thawhpui chuan MLA election campaign hunah sawi tur kan neih pawh kan ring lo. Nimin lawk thlenga kan beih reng han thawhpui leh si kha a tha lo kan ti a ni. Chuvang chuan, thawhpui loh nise tih hi PAC hian vawi thum a rel a, a vawi li-na atan kan dinna hi kan puang nawn leh a ni,” a ti bawk.
MPCC president hian thu thar thehdarhtuten MADC-a Congress MDC palite show cause pek a nih chungchang leh hrem an nih leh nih loh zawhna chu PAC thutlukna a puan chin bak sawi belh tur a neih loh thuin a chhang a ni.