Aizawl: ZPM leader, MLA ni bawk, Lalduhoma’n nimin khan Champhaia grape winery a tlawh a, Champhai Grape Growers Society hruaitute nen an inkawm bawk.
Lalduhoma chuan Mizorama grape thar ngei sawngbawlna mumal tak Mizoramah a awm chu a lawmawm hle laia harsatna an tawk chu hriatthiam har an tih thu a sawi a. Grape wine chu Food Safety & Standard Authority of India-in food item-a a puan a nih thu leh winery pawh food processing unit-a ngaih a nih thu sawiin, “Champhaia winery pawh hi zu siamna factory a ni lo va, food proceesing unit zinga mi a ni,” a ti.
Mizoramah kum 2005 atangin grape chu eizawnna atana hmang an awm tan nia sawiin, Lalduhoma chuan Hnahlan leh Champhaiah pawh chhungkaw tam takin eizawnna atan an hmang a, winery pawh sorkar hriatpuia din a nih thu leh horticulture department chu nodal department an nih thu a sawi.
Mizoram chhung mai ni lo, ram pawn thlenga thawn chhuah dan turte ngaihtuaha hma nasa taka an lak mek laia harsatna an tawk ta mai chu pawi an tih thu a sawi.
Lalduhoma chuan ZPM party-in thuneihna an chang a nih chuan grape chingtute chu an policy hnuaiah tanpuina an pe dawn niin a sawi a. “Enterpreneurship hi keini chuan kan ngai pawimawh a, bul tanpui tlak an niha project hlawhtling tur a nih chuan kan pui dawn, sorkar chu guarantor-ah a tang mai dawn a, thalai thiamna nei si, bul tanna nei lote kan chawikang dawn a ni,” a ti bawk.