Europe ram tam taka khaw ro lutuk leh thli na tak tleh rengin ram kang a tihman kai chak mek laiin France ram khaw tam takah a mi cheng leh chawlh hmang tlawhtute chuan ram kang hi an tlanchhiatsan.
Chhimthlang lam, Gironde region-ah chuan tun ni reilote chhungin mi 10,000 chuang hmun himah insasengin an chhuak tawh.
Portugal leh Spain-ah pawh hmun tam takah ram a kang a, khaw lum lam lah 40°C chung lam a ni vuh bawk.
Heng ram pahnihah hian khaw lum lutuk kaihhnawihah mi 281 vel an thi tawh.
Spain khawthlang lama khaw eng emaw zat chu tihruah vek a ni.
Sik leh sa inthlak nasa avangin khaw lum uchuak tak hi a na telh telh a, a rei telh telh a, sawi lawk a harsa telh telh bawk a. Khawvel pum hi industrial era hun lai aiin 1.1°C chuangin a lum tawh zawk a, ram tak taka sorkarten khaw tilum zualtu tihchhuah tlem tumin tan an la mek bawk.
Spain-a kangthelhtute chuan sava chi hrang hrang awmna, Monfragüe national park chhim lama ram kang avangin Monsagro khua chhan tumin an bei mek a. Park khawchhak lam hreta awm, Cáceres-a N-5 kawngpui chu ram kang hian athlen tawh avangin khar a nih phah.
Zirtawpni khan Spain khawthlang leh Portugal-ah chuan khaw lum lam hi 40°C a hawlh phak a. Ningani khan hmar lama Pinhão-ah chuan 47°C zet niin Portugal rama July thlaa a lum ber tum a ni.
Spain bikah hian a zirtute chuan khua hi Zirtawpni hnu lam atang chuan a ziaawm tan dawn niin an sawi lawk.
Carlos III Health Institute chuan Ningani khan khaw lum uchuak hmasa ni hnih, Pathianni leh Thawhtanniah khan mi 43 vel thi an awm niin a sawi.
Portugal-a damdawi in thuneitute chuan July 7 atang khan khaw lum kaihhnaihah mi 238 an thi tawh niin an sawi a. A tam ber hi kum upa, naupang leh natna benvawn neite an ni.
Zirtawpni tuk thleng khan Portugal-ah hian hmun 30 chuangah ram a kang a, heng zinga pakhat hi an ram laili, Leiria region-a Pombal-a ramngaw kang telin chawlhkar khat a awh tawh a. Sq km 300 zeta zau kang tawhin kum 2021 puma kang aiin a zau tawh zawk.
EU hnuaia Copernicus emergency management service chuan Europe chhim lam leh Morocco-a ram kang mai thei dinhmuna ding map tichhuakin a zau ber tum a ni.
France chhimthlang lama police-te chuan in tin luhchhuahin Bordeaux chhimthlang, Cazaux district-a cheng mi 4,000 chuangte an in chhuahsan turin an hrilh a. Meikhu chuan La Teste-de-Buch khua pawh bawhin khaw chhuahsan tur an inhnawh tawt leh hle a, lut lam tur chu police-in an dang rih.
Chawlh hmanga zin, Matthias chuan BFMTV hnenah a fapa nen rang taka chhuak tura tih an nih thu a sawi a, “Kan bungruate kan fun kan tum a; mahse, hmeichhe pakhatin kalsan vek tur leh chiai lo turin min hrilh a, muangchang lova rang taka chhuah a ngai tih min hrilh,” a ti.
Tun hnai maiah pine kung awmna sq km 73 vel a kang chhe tawh a, heng zingah hian Arcachon leh Landiras chhehvel pawh a tel a. Khaw lum lam chu 40°C kaiin kangthelhtute chuan thla hnih vel nipui hun a la awm a, a huphurhawm thu an sawi.
Italy leh Croatia-ah pawh ram kang a awm a, thli chak tak tlehin Greece rama region pangaah ram a kang mai thei tih sawi a ni bawk.
Greece laili, Attica leh Create te chu ram a kan mai theihna zingah a tel tih thuneitute chuan an sawi a, tumah thil tikang thei zawnga khawsa lo turin mipuite an ngen.
Zirtawpni khan Crete leh Attica-ah kangmei a chhuak tih sawi a awm a, emergency services chuan Athens chhimchhak lam, Feriza Saronikos khuaa chengte chu vaukam lama insangseng turin an hriattir.