Mizoram Super League season 7 champion zaninah a chiang dawn a. Finals a inhmachhawn Zarkawt BCA leh Khatla TBL ten game 3 an khel dawn a, a chak zawk an champion tawh dawn.
Ningani zanah R. Dengthuama Indoor Stadium-ah game 2 khelh a ni a. Zarkawt BCA in game 1 a an tlawmna nawtreh in 78-68 in hnehna an chang a, 1-1 in an elpuite nen hian an inhnehtawk.
Game 1-ah an khingpuite tha za an tluk lova, MSL champion lai Zarkawt BCA in chetsual an tum tawh lo.
1st quarter-ah TBL an san fal tir tawh lova, point an in score chhawk. Rebounds lakah an player paliante an tang nghal hle bawk. Hei hian an tan remchang siam thinin chhanlet lohin point an score zawn theih thin phah a, halftime ah point 11 in an sang.
Khatla TBL an insiamtha hleithei lova, 4th quarter-ah an shooting tha hmuh tur rawn awm leh mahse point 18 a hma hruai hman an khingpui an pawtthla zo tawh lo.
Zarkawt BCA tan Joseph Allen leh Lalrina Renthlei ten point 23 leh 22 an score ve ve a. Rebound 17 leh vawi 8 an la bawk.
Matthew Remtluanga Sailo leh Lalhnehpuia Chhakchhuak ten point pawimawh an score thin bakah defense-ah an tangkai bawk.
Khatla TBL tan Levi Bradley Jr. chuan point 38 a score a, rebound vawi 8 a la bawk. Midangin point 10 an score tling lo thung.
Zanin game 3 hi dar 8:30-ah khelh a ni ang.