Mizoram Cycling Association chuan Zirtawpni khan Aizawl Synod Conference Centre ah an Association Annual General Body Meeting hmasa ber an hmang.
Kum kalta chhunga an thil tih hrang hrangte thlir kirin hmalam huna hmalakna tur engemawzat an thlir lawk a, ruahmanna awm sate an pawm nghal.
MiCA rorel inkhawmah hian rokhawlhn a awm lo a nih chuan kumin October thla hian ni hnih awh tur mountain bike hmanga intlansiakna pui tham tak huaihawt chu rel a ni a. He intlansiakah hian India hmarchhak huam chhunga cheng cyclist te pawh tel theih a ni dawn.
Kum thar 2023 March thlaah MTB Mizoram intlansiak huaihawt tum a ni bawk.
Hun remchang hmasaah school naupangte cycling a inelna tur huaihawt tum a ni bawk a. Inelna kalphung tur zirchian hmasak turin an rel a. Kum 2022-2023 chhunga MiCA Budget an pawm nghal.
Rorel inkhawm hi President Dr. Franklin Lalrinngheta chuan kaihruaiin, General Secretary Pu PC Ramengmawia chuan kum thum vel kalta atanga Association hmasawn chhoh dan te a tarlang.
MiCA hi Mizoram a sports association naupang ber zing ami niin kumin May thla khan Mizoram State Sports Council in a pawmpui a, MSSC-affiliated Sports Association 33 na a ni.
MiCA hian Mizo cyclist-te tan kum 2019 atang khan inelna leh rally thahnem tak a lo huaihawt tawh a. Sorkar department hrang hrang nena thawk dun thinin - Tour de Hmuifang, MTB Winter Challenge, MTB Mizoram, Downhill Challenge leh Aizawl khawpui chhungah rally engemaw zat a lo huaihawt tawh.