Chief Minister Zoramthanga chuan Parking House Support Scheme (PAHOSS) an kalpui chu a tha viau a, tuna a rilrua awm thar leh ta chu garage loan project kalpui a nih thu a sawi.
He thu hi nimina ‘Federation Enclave’ a tlangzarhnaah a sawi a, Zorama chuan, “Ka rilrua awm chu garage loan project kalpui a ni a, bank atangin loan an la ang a, veng kilkhawr deuhah pawh motor pali panga dah theihna tur garage tê deuhte pawh loan hmangin an siam ang a, a pung tur chu sorkarin lo subsidise-pui tur angin,” a ti.
Garage loan project chu a hmathlir chauh a ni rih a, committee-ah pawh a la thlen lo tih a sawi a. Aizawlah hian kawng chhawng siam a nih loh chuan tlan ngaihna a awm tawh lo tiin, ruahmanna hrang hrang an siamte a hlawhtlin hunah chuan Aizawl khawpui chu hmun nuam takah siam theih a nih thu a sawi.
Federation of Mizoram Government Employees & Workers (FMGE&W)-in housing society system an kalpui tur chu tha a tih thu a sawi a, hmun dangah, district dangah pawh hetiang ang housing complex siam duh an la awm zel theih thu a sawi a. Hmasawnna ruhrel tha din tur chuan plan tha tak neih a pawimawh thu te, eng hmalakna pawh ni se, vision neih thata tuma chian chuan engtikah emaw a hlawhtlin tur thu te, a tlachawp chin chiah ngaihtuah thin nih a hlauhawm thu a sawi bawk.
Khualzahawm Er. K. Lalsawmvela, Adviser to CM (Technical) pawhin thu sawiin sorkar hnathawk chu an service chhungin hmun hrang hranga post kual an nih thin avangin tam tak tan in hmun nghet tur ngaihtuah a remchang lo thin a, heng housing complex hian remchanna sawrkar hnathawkte tan a thlen dan tur sawiin, a tam thei ang berin an ngaihvena booking an tih thuai a duhsak thu a sawi.
Mizoram sorkar hnathawkte puala World Class Housing Complex ‘Federation Enclave’ din turah hian Flat/Apartment 344 awm tura ruahman a ni a. Heng flat/apartment-te hi luah hawh tur ni lovin, a leia lei tur a ni a; a leitute chu permanent owner an ni nghal ang.
‘Federation Enclave’ hi India leh India hmarchhak huam chhunga housing complex changkang ber ni tura din tum a ni.