Chanchinbu khawvela chawimawina ngaihhlut hlawh, Pulitzer Prize pawh lo dawng tawh, Indian photojournalist Danish Siddiqui chu Afghanistan-ah thah a ni tih Afghan palai chuan Delhi-ah a puang.
Siddiqui hi India rama Reuters news agency chief photographer a ni a, Afghanistan-ah hian a hna thila zin a ni.
Pakistan nena an inrina hnaih taka Afghan sipai convoy a zui chu Taliban helhovin an lo lambunnaah a thi tel niin sawi a ni.
India sorkar chuan engmah a la sawi ve lo thung a. Beih an tawhnaah hian mi engzat chiah nge thi tih pawh hriat a ni lo.
India-a Afghanistan palai, Farid Mamundzay chuan a thian tha tak thi tih a hria chu pawi a tih thu leh a tawrh thu a sawi.
Siddiqui hi Afghanistan-ah hian United States-in a sipaite a lak chhuak mek laia Kandahar bawh vela Afghan sipaite leh Taliban-te inbeihna leh mipuite tawrh dan thlithlai tura a kal a ni.
Taliban hian Afghanistan hi kum 1990 tir lam atanga khan thununin kum 2001-a US-ina rûn khan an tlawm a. An pawl hi mihring dikna chanvo palzut leh Afghan mite nunphung suasamtua puh an ni.