Tripura thingpuife thar chhuahte chu hun reilo teah thenawm ram, Bangladesh-a zawrh chhuah tuma hma lak mek a ni.
Chief Minister Biplab Kumar Deb chuan state sorkarin thingpui hmanga ei zawng leh he industry huang zauh zelna atan coronavirus hri leng mek a zawh veleha Bangladesh-a thawn chhuah tan an tum tih a sawi.
Deb chuan Tripura Land Record & Land Reform Act tihdanglam niin thingpui huan hman loh ram 5% chu eco-tourism tihhmasawna hemi atanga sum lak luh nana hman tum a ni tih a sawi bawk.
Deb chuan thingpuia sumdawmna chu Tripura-a industry hmasa ber a nih thu leh a kaihhruai BJP-IPFT sorkar chuan he industry-in a hlutna a lo hloh tawhte hnuh kir ngei a tum tih a sawi.
An awmna hmunin a zir loh avang leh sum lamah pawh an pachhiat thin avanga harsatna an tawh thin sut kian nan thingpui huan chu khualzinte hip nana hman tura buatsaih tum a nih thu a sawi bawk.
Deb chuan thingpui huan tam takah hman tangkai loh ram a awm teuh va; mahse, danin thingpui chin nan bak hman a phal si loh avangin khawih ngam a ni lo tih sawiin, “Dan siam danglam hmang erawh chuan hotel, thingpui dawr leh golf course thlengin a siam theih tawh dawn a, chu chu sum lak luhna tur dang a ni ang,” a ti.
“Thingpui behchhana eco-tourism hi thil thar a ni lo va, tun laiah duhna a sang zel zawk a. Than pawh a thang chak hle a ni. Mihring hian khuarel thil hi hmuhnawm leh nuam an ti a, chu chu thingpui huante hian an nei,” tiin chief minister chuan a sawi.