BJP State President Vanlalhmuaka chuan BJP in Dampa bialah MLA an neih chuan bial hmasawn ber a nih theihnan hma an lak tur thu sawiin, tun thal chhungin Kanghmun field laih zauh hna thawh tan a nih tur thu a sawi.
Zirtawpni zan khan Kanghmun Community Hall-ah Vanlalhmuaka chuan Volleyball jersey a tlangzarh a. He hunah thu sawiin, Kanghmun field laih zauh hna thawk turin kumin thal chhungin Kanghmun field-ah hian JCB a lut dawn tih a sawi a. "Kanghmun thalai te'n infiamna kawnga hmasawnna tha zawk kan neihna turin hna kan rawn thawk dawn a ni," a ti.
Dampa bialah BJP in MLA an neih chuan, bial hmasawn ber a nih theihna'n hma an la dawn tih sawiin Vanlalhmuaka hian, "Model constituency atan kan siam dawn a ni," a ti a. Kawng chhe lutuk leh te lutuk te an siam that tur thu te, hriselna kawngah te, lo neitu te tana hamthatna tha zawk leh thlai thar chhuah hralhna turin hma an lak tur thu leh Dampa bial hmasawnna tur hrang hrang, mipui mamawhte tihlawhtling turin hma an la dawn niin a sawi.
Jersey tlangzarh inkhawm hi Kanghmun YMA Vice President K Lalhmingthanga'n a kai hruai a ni.