Congress hruaitu leh governor lo ni tawh, Margaret Alva chu India vice president thlan turah eptu tangrualte candidate intawm a nih dawn thu National Congress Party President Sharad Pawar chuan Pathianni khan a puang.
Inrinni khan BJP kaihhruai NDA chuan West Bengal Governor Jagdeep Dhankhar chu an candidate tur a nih thu an lo puang tawh a, a tukah eptute hian an puang veleh ta a ni.
Kum 80 mi, Alva hi union minister pawh lo ni tawh a ni a, August 6-a inthlan tur atan hian hming pek luh theih hnuhnung ber, Thawhlehni hian a hming a pe lut ang.
A chenna ina eptu party hrang hrang hruaituten an sawiho hnuah Pawar chuan party 17-ten inlungrual takin an candidate tur hi an thlang tih a sawi a. “Lungrual taka kan pawm chu Alva-i niin vice president inthlan chuh tur hian Thawhlehniah a hming a pe lut ang,” tiin a sawi.
Alva-i pawhin Twitter-ah eptu tang rualten vice president inthlan lo awm tura an vawrh chhuak chu atan a hlin chawimawina ropui tak a nih thu a tar lang.
“Min rawtna hi lawm takin ka pawm a, kan hruaituten ka chunga rinna an nghat hi ka lawm tak zet a ni,” a ti.
Pawar-a chuan a ina inhmukhawm party 17-te bakah hian Trinamool Congress leh Aam Aadmi Party chuan Alva-i hi an candidate-ah an pawm ve dawn a, party 19 an ni dawn tih a sawi.
Shiv Sena MP Sanjay Raut pawhin he inthlanah hian eptute chu an inlungrual hle tih a sawi.
“Mamata Banerjee leh Arvind Kejriwal-a biakpawh kan tum a. A hnuhnung ber, president chuh turah kha chuan min thlawp ve ve a ni,” a ti a. Jharkhand Mukti Morcha (JMM) pawhin eptute lam hi an tang tih a sawi bawk.
Pawar-a ina eptu inhmu khawm zingah hian Congress hruaitu Mallikarjun Kharge leh Jairam Ramesh; CPI(M) hruaitu, Sitaram Yechury; CPI hruaitu, D Raja leh Binoy Viswam; Shiv Sena hruaitu, Raut; DMK hruaitu, TR Baalu leh Tiruchi Siva; Samajwadi Party hruaitu, Ram Gopal Yadav; MDMK hruaitu, Vaiko leh TRS hruaitu, K Keshava Rao te an tel.
Anni bakah hian RJD hruaitu, AD Singh; IMUL hruaitu, ET Mohammed Basheer leh Kerala Congress (M) hruaitu, Jose K Mani te pawh an tel bawk.