Bangladesh pana thlawk bungrua tonne 11 zeta rit phur thlawhna, rah puah bomb-te pawh phur tel chu Greece hmar lamah a tla tih thuneituten an sawi.
Antonov-12 thlawhna tlakna hmun atanga kilometre hnih huam chhunga chengte chu pawn chhuak rih lo turin an ti.
Thlawhna hi Serbia atanga Jordan lama thlawk niin Inrinni tlai khan Kavala bul lawkah a tla a, a chuang mi pariat an thi vek.
A tlak lai video latute atanga a lan dan chuan a tlak hian a kang a, mei alh a inphuh chhuak nasa hle.
Pathianni tuk khan drone hmangin thlithlai a ni a, hlauhawm a awm em tih en a ni.
Sorkar enkawl TV chuan sipai, puak thei lam mi thiam leh Greek Atomic Energy Commission staff te pawh a him tawk tih chian a nih hma chuan luhtir pawh phal a ni rih lo.
“Boruak tehna atang chuan engmah a la lang thei lo va, a hmunah hian a him tawk em tih pawh hriat a la ni lo,” tiin Northern Greece Fire Brigade-a Lieutenant General Marios Apostolidis chuan thuthar lakhawmtute a hrilh.
“Tawngkam danga sawi chuan a khu nasain a sa em em a, thil var, engnge a nih kan la hriat chiah theih loh a awm bawk a, special armed forces team hnenah pawh a tlaknaah hian kal luh tur thu pek pawh a la ni lo,” a ti.
A khalhtu hian a thlawh chhuah hnu lawkah a khawlpui fel lo avangin Kavala airport-ah tum a dil a; mahse, tlankawng pawh a thleng hman ta lo a ni.
Thlawhna hi an ram sanaa zan dar 10:45 (India-ah Pathianni zing dar 1:05)-ah an hmu tih a tlakna bulhnaia mite chuan an sawi.
A tla lai hmutu, Aimilia Tsaptanova-i chuan an in chunga a tla lo chu a mak a tih zawk thu a sawi.
“A khu nasa em em a, a bengchheng bawk a, ka sawi fiah thiam lo,” a ti a. “Tlang thlawh pelin lovah a tla ta a. A kang kan hlau va, car tam tak an lo kal a; mahse, a puah chhunzawm zel avangin an pawh thei lo,” a ti.