Aizawl: ZPM Leader Lalduhoma’n, “Kan sorkar veleha kan bitum hmasak tur chu eirukna a ni. Eirukna hi a lu ber atanga intan a ni a, chief minister ber a fihlim loh chuan a hnuaia mite an fihlim thei lo,” a ti.
Inrinni khan Champhai Kanan, Bethel kawn, Kelkang leh Dilkawn te tlawhin vantlang inkhawmah Lalduhoma chuan heng thu hi a sawi a. Eirukna chu system mumal tak hmanga hneh theih niin a sawi.
Lalduhoma chuan, “Lok Ayukta hi eirukna veng tura din a ni a, tuna kan Lok Ayukta neih hi chu a hming mai a ni, hnathawktu tur staff pawh an awm mumal lo,” a ti a. “Kan sorkar hunah chuan tun aia changtlung zawkin kan thuam ang a, hnathawk theiin kan siam dawn,” tiin, CBI pawh an koh luh tur thu sawiin, “Zalen taka hna an thawh theihna turin zalenna leh thuneihna kan pe dawn,” a ti.
ZPM leader chuan ZPM-in a din tirh atangin thiktu leh ertu a ngah hle nia sawiin, “Sorkar siam tûrin theihtawpin kan tang ve a, kan sorkar siam tum erawh chu a danglam a, kan sorkar hrawn tawh ang ni lo, party sorkar ni lo, mipui sorkar a ni,” a ti a. Mi thiam rualte nen hun rei tawh tak atangin an sorkar huna ram an kaihhruai dan tur an duang nia sawiin, sorkarna siama rorel turin an inpeih tawh niin a sawi.
Kuthnathawktute chungchang pawh sawiin, Lalduhoma chuan, “Kuthnathawktute hi kan ngaih pawimawh ber an ni reng a, ei leh bara kan intodelhna tura thawktu ber an ni,” tiin, “Hei hi sorkar pawhin a hria a, kuthnathawh chawikanna turin thlai chi hrang hrang min chintîr thin a, a hralhna lam an ngaihtuah leh si lo va, hnathawktu beidawng min siam ta teuh mai a ni,” a ti.
ZPM a sorkar hunah chuan kuthnathawktuten a market leh a rate hre sain thlai an ching dawn nia sawiin, “Bâna kaih policy hmangin kuthnathawktute kan chawikang dawn a ni,” a ti bawk.