Europe khawmualpuia khaw lum tak karah ram kang chuan a huam zau zel a. France chhimthlangah chuan mi 14,000 chuang hmun hima insuan chhuah ngaiin Spain, Croatia leh Greece-ah pawh an buai hle bawk.
France-a khualzinte tlawh tam tak, Gironde-a thuneitute chuan mi inkulhna thina vengtu (guard)-te chu chhuak turin an ti a, a hmain khualzinte an chhuahtir tawh bawk a. Kangmei hian Teste-de-Buch leh Landiras huam chhung pawh a kai tawh.
Spain chhim lama Mijas hills an tihah chuan kangmei tlanchhiatsan mi 3,200 chuang an awm tawh a, mi thenkhat erawh an kir leh thei tawh bawk.
Portugal-a ram kang nasa zualpui erawh thelh theih a ni tawh.
Hetih lai hian Portuguese thuneitute chuan khaw lum uchuak tak avangin chawlhkar khat liam ta chhungin mi 238 vel an thi niin an sawi.
Spain-a Mijas fires hi khualzinte tlawh tam, Málaga atanga hla lo tak a ni a. Spain-ah hian Castilla y León leh Galicia province-ah te pawh ram a kang bawk.
Málaga-a cheng, Ellen McCurdy chuan Reuters hnenah, “Kan mamawh zual nen kan tlan chhuak a, khawlaiah mi tin mai tlanchhia hmuh tur an awm a, ambulance leh fire engine a tam em em bawk,” a ti.
Mediterranean tuipui kam hrul, khawthlang lamah Morocco atanga chhak lamah Crete thlengin, kangthelhtu mi sang chuang leh waterbombing aircraft tam takin ram kang thelh hna an thawk a. Thawhlehni atang khan heng lai hmun hi a lum em em a, thlaite pawh an ro thawt thawt thei.
Sik leh sa inthlak nasa avangin khaw lum hi a na tawlh tawlh a, a rei tawlh tawlh bawk niin mi thiamte chuan an sawi a. Khawvel pum hi industrial era hun lai aiin 1.1°C chuangin a lum tawh.
French weather service chuan Pathianni khan an ram chhim lamah chuan 41°C a tlin thu leh Thawhtanniah a aia lum zawk a nih an ring a. In Portugal-ah chuan tun hnaiah 47°C a tling bawk.
UK-ah pawh khaw lum uchuak tak a thleng dawn niin an sawi lawk a. Thawhtanni leh Thawhlehni hian record thar a awm hial ringin hmun thenkhatah chuan 41°C a tlin theih an ring.
Morocco-ah chuan hmar lamah ram kang avangin mi 1,300 chuang hmun himah chhuahtir niin kangthelhtu tam takin an bei a. A tuar na ber chu Larache province an ni.
Crete-ah Greek kangthelhtuten hmar lam tuipui kam, Rethymno tlanga ram kang an thelh mek.
Turkey chhimthlang leh Croatia-a Adriatic vaukam pawh ram kang avangin an buai hle a. Croatia-ah hian chawlh hmanna khua, Zadar leh Sibenik bul lawkah ram a kang a; mahse, tumah insaseng tura hriattir erawh an la ni rih lo.
Inrinni tlai khan France chuan regional department 22, Atlantic vaukama mite chu orange alert a pe.
France chhimthlang lama cheng pakhat chuan ram kang chu a rapthlak hle tih a sawi a. Ram hectare 10,500 vel kang tawhin Interior Minister Gerald Darmanin chuan kangthelhtute chet dan fakin ‘an huaisen dan chhinchhiahtlak’ tiin a sawi.
“Rang takin thil a lo thleng a, kangmei pawh a nasa rapthlak hle,” tiin kum 27 mi, Manon Jacquart chuan BBC a hrilh a. Nilaini tuka mi an inkulhna thina a thawhna atanga lak chhuah a ni a, Teste-de-Buch bula awm khawmna siamah mi dang tam tak nen an riak a ni.
“Ka thlaphang a, ka hlau va; huai taka awm hram hram tum mah ila ka thei lo. Tun kara thil thleng hi theihnghilh ka duh a ni,” a ti.
Hetih lai hian Alps tlanga lawn turte chu lung tla mai thei a awm hlauvin Mont Blanc pan rih loh turin an ti.
Portugal-ah chuan ram hectare 30,000 vel kuminah a kang chhe tawh a, a tam ber hi hmar lamah a ni a. Kum 2017 hnu lama nipuia ram a kan chhiat tam ber tum niin hemi kum hian ram kang vang hian mi 100 vel an thi.
Spain chhim lamah Torremolinos-a chawlh hmangte chuan an bul lawk tlanga ram kang nasa tak an hmu pha a. Thlawhna hmangin thil a kang har thehdarh a ni a, helicopter hmangin tui chawiin an thelh bawk.
“Kan vengah in 40 chuang a awm a, kan vaiin kan hlau va, pawnah leh kan bathlarah kan awm a, kan thlir reng a ni,” tiin mi cheng pakhat, Ashley Baker chuan a sawi.
“Tlang chhip a kang a, ka kal chhuahsan tawh a, ka hahdam tawh,” a ti bawk.
Italy-ah chuan sorkar chuan an rama lui sei ber, Po Valley chhehvelah emergency a puang.