UN mi thiamte chuan February 1-a sipaiten mipui rorelna an hnehchhuh hnuah naupang 75 lai an thih phah tawh a, mi 1,000 chuang an hreng mek niin an tar lang.
UN child rights committee chuan thu lakna rinawm tak nei nia insawiin Myanmar-a naupangten sipaite vangin harsatna an tawk mek a, thihna an tawh phah fo niin an chairman Mikiko Otani chuan a sawi.
Sipaiten civil mite hotu, Aung San Suu Kyi leh a kaihhruai hruaitute an man hnuah an ramin a huhova lungawi lohna lantirna leh sipaiten an bei letna avanga buaina karah naupang an awm a, inkahna leh ni tin mi tam tak sipaiten an man thin an hre thin tih Otani hian a sawi.
A changin silaiin tin an ni a, an nu leh pate leh an unaute chunga sipaite chet dan pawh an hmu thiam ve vek tawh niin a sawi bawk.
Committee hi mi thiam hrang hrang 18 telna a ni a, kum 1991 khan naupangte thlithlaina turin Convention on the Rights of the Child tih thupui hmangin Myanmar nen hian inremna an siam.
Mi thiamte chuan sipai leh police-ten naupang nunna an laksak chu an dem hle a, thenkhat phei chu an chenna inah ngei thahin an awm niin an sawi.
Heng zinga a langsar zual pakhat chu Mandalay khawpuiah hmeichhe naupang kum 6 a upa chu police-in a pumah kapin a thi niin an tarlang.
Nunna an laksak mai piahlamah police station, tan inah leh sipai tan inah naupang tam tak an hreng thin chu an duh lo hle.