Aizawl : National Health Mission Employees Union of Mizoram (NEUM) chuan thuchhuah siamin, an hlawh chungchangah tunhmaa direct funding a nih lai chuan buaina a awm ngai lo niin an sawi.
An thuchhuahah NEUM hian National Health Mission (NHM) sum hi tunhmaa direct funding a nih lai chuan buaina a awm ngai lo tih sawiin, kum 2014 atanga state treasury kaltlanga pawisa dil a ngaih tak avangin NHM pawisa hi a lo berah ni 60 tal a tang thin niin an sawi a. Utilization behchhan-a sum pekchhuah thin anih avangin pawisa hman a ti muang a, a hun takah Utilization Certificate pek theih a nih thin loh bakah, state matching share pek chhuak a muang thin tih sawiin, sorkar laipuiin utilization leh SMS pekchhuah dan behchhana a pek thin vangin central sanction hi a tlai ta thin niin an sawi.
NEUM chuan Covid-19 len lai bikah phei chuan Supreme Court thupek ding lai angin hripui doa a hmatawnga thawkte reng reng hlawh hi pe tlai lo tur leh a hun taka pe tura a tih niin, he dan zawm lo te chu Disaster & Management Act hmanga hrem theih hial an ni tih sawiin, heti chunga hrileng dona kawnga a hmatawnga thawkte hlawh hi vawi tam tak, rei tak tak hren a ni zel zawk hi, thawkthute ngaih pawimawh an hlawh lo mai ni loin, ngaihthah an ni hial zawk niin an sawi bawk.
CSS hnuaia thawk department 16 te hi hnathawh dan leh kalphung inang lo tak tak an nih hlawm avangin sorkar lamin thil a kal zung zung thri lo tiin NEUM te a hrilh laia, ni hnih thum lek chhungin Study Group in department a zirchian te chu Law & Juditial atangin DR&AR a thlen phei hman avangin, sorkar hian chak taka hma lak a tiam mai hi a harsat an rin loh thu, an thuchhuahah an tar lang a ni.