Damlo enkawlna kawnga thawktu mi 2087-in ni sarih chhung sorkar lakah nuarin hna an thawk tawh lo a, hei hian kawng hrang hrangin mipui harsatna a siam tan a; Civil Hospital, Aizawl (CHA)-ah pawh rikrum thilah loh chuan damlo an zai thei tawh lo.
A hun taka hlawh lak, medical re-imbrushment neih ve, Transfer TA neih leh health department-in hna a laka NHM contractual staff-te tana hamthatna neihtir phuta sorkar kar mek, Nation Health Mission, Mizoram hnuaia thawkte hi July 11 atang khan mass casual leave lain an nuar tan a; sorkar atanga thu lawmawm an la dawn loh zel avangin tiamchin awm loin an nuar chhunzawm ta a ni.
Mipui nawlpuiin an pan rawn, CHA pawhin NHM, Mizoram hnuaia thawkte nawrhna hi a tuar mek a. A bikin, staff nurse indaih lohna, laboratory kalpui mumal theih lohna a thlen phah.
The Zozam Times-in zawhna CHA hotuten an chhan danin damdawi ina thawk staff nurse 199 an awm a, chung zinga 63 (31.65%) chu NHM hnuaia thawk an ni a, tun dinhmunah nurse zingah chawl la leh Covid-19 kai hna kal thei lo an awm bawk nen, duty thei chu 128 chauh an awm.
Thawktute sawi zel danin nurse duty dan hi chawhma, chawhnu leh zanah (shift thum)-in an then thin a, tun dinhmunah chuan chhun leh zanah an in-duty chhawk a ngai a, chawlh la duh tan pawh remchang a awm rih lo a ni ber.
CHA-ah hian Operation Theater paruk - ENT, Eye, Ortho, Surgery, Gynae leh minor OT te a awm a, minor tih loh OT dangah hian nurse paruk theuh an awm thin laiin NHM hnuaia thawkte an nawrh avangin nurse pahnih theuh bak an duty thei ta lo a. Hei vang hian OT-ah hian emergency bak chu inzai an kalpui thei ta rih lo niin CHA hotute zinga miin The Zozam Times a hrilh.
He damdawi ina laboratory-ah department pathum - Pathology, biochemistry leh microbiology a awm a, chungah pawh chuan thawktu tam zawk chu NHM hnuaia thawkte an la ni leh ta zel a, thisen, zun leh thil dang endik ngaite chu mi mal enkawl laboratory-ah man to zawkin endik a ngaih phah tih thawktuten an sawi bawk.
CHA-a thawktuten an sawi zel danin department of Radio - Diagnosis & Imaging-ah pawh thawktu indaih lohna a nasat zual phah hle bawk a. OPD-a inentir X-Ray an tihsak thin a zabiin an awm thin a, tuna thawktu thenkhat an chawlh takah chuan ni khatah mi 10 bawr vel chauh X-Ray an kalpui thei a; hei pawh emergency leh damdawi ina awm mekte chauh an tihsak a ni.
CT Scan, Ultra sound leh Mammography te pawh emergency thil lo chu endikna kalpui theih a ni lo a. The Zozam Times zawhna thawktute an chhan danin CHA-ah hian heng endiknate hi man tlawm zawka tihsak an ni a, hetianga an endik theih tak lohah chuan doctor-in ti tura a tih avangin man to takin private-ah an tih a ngaih phah a; chu chu thawktute nawrhna mipuiin an tawrhna chu a ni.
NHM, Mizoram hnuaia thawkte nawrhna hi CHA chauhin an tuar lo a, hmun thenkhatah chuan sub centre te, Health & Wellness Centre te khar a ngaih phah.
Covid-19 leng hluar leh mek karah sample endikna hmunte chu a kalpui theih loh a, tun hnaia hri kai hmuh chhuahte chu Rapid Antigen Test hmanga hmuh chhuah an ni a, district hrang hrang TrueNAT laboratory-ah sample endik a theih loh a, ZMC leh Lungleia RT-PCR laboratory-ah pawn sample an endik theih loh phah bawk.