Buaina atanga buai lehzualna kan nghak
Kum hmasa lam atang tawhin kan ramah kuhva tawlh chungchang kan buaipui tawh a. Kan media hrang hrangah pawh englai pawhin hmuh tur a awm a. Champhai lamah phei chuan kuhva man sa hal te, DC transfer, mipui kawngzawh thlengin an buai mup mup anih kha. Mahse chung boruak chu a la tawp hauh lo mai a. Kan sawrkar thuneitu berin ngawih a la chuh tlat avangin buaina ril zawk a la inmun chho zel niin a lang.
Kuhva tawlh chuan kan ram khawthlang lama kuhva chingtute a nghawng chhe ta a. Chuti chung chuan Sawrkar chu a la ngawi zel a. Kuhva chingtute thinrim chuan kuhva an man a. An hal a. Mahse, kuhva halah chuan a la tawp lo tho mai.
Kuhva tawlhtute chuan lamtang nei thaa an inhriat vang nge ni buaina dang a awm leh ta. Khawchhak atanga ramdang bungraw lo lut zawng zawng an dang leh ta. An ngampa ta sarh sarh hle. Dan bawhchhiaa sumdawng an ni tih reng an inhre tawh lo. An thupui ber chu kan eizawnna a ni tih a ni tawp mai.
Ngaihtuah hian kan ram hi a va rapthlak em aw. Sawrkarin hmun hrang hranga harsatna leh buaina thleng chu a ngawihsan lui tlat a. A nihna takah chuan khawchhak leh khawthlang eizawnna a inrem thei ta lo. Hetiang hi kan lo thlen takah chuan tunge mawh phur a, he harsatna hi tu in nge chingfel dawn tih hi zawhna a ni ta. Sawrkar nei lo ang maiin mipui harsatna leh buaina chu a in ep zawngin a kal tan tawh a. A huai huai, a chak chak, a hausa sa thuneihnaah kan ram hi a chhuak ta a ni.
Mipui buaina hi a chingfel theitu leh mawhphurtu a ngawih tlat chuan mipuiin chinfel a ngai a ni ta ber a. Tuna kan dinhmunah chuan tu pawhin chem tum nen a eizawnna thlavang hauhin lo penchhuak se thiam lohna a nei bik lovang. A dinkhawchhuahna atan a thlavang hauhtu a neih loh chuan amah leh amah a in enkawl a ngai a ni ta ber mai. Phengphehlepa khua a tlai hma hian mawhphurtu hi harh mawlh teh se.