Tribal politician Droupadi Murmu-i chu India-a president thar tur thlannaah beiseiawm tak ni mekin tribal hmeichhe zinga India president ni thei hmasa ber a ni mek.
Rorel lai, BJP-in an candidate, kum 64 mi hi Odisha chhuak niin zirtirtu a ni thin a, state governor pawh a lo ni tawh.
Thlan tlin a nih chuan India rama tribal zinga nihna sang ber chelh hmasa ber a ni ang.
India-ah hian president hi ram hotu lu ber a ni a; mahse, thuneihna tawp erawh a nei lo thung.
A thlangtute hi ram rorelna, parliament-a in hniha member-te bakah state leh union territory-a legislative assembly member-te an ni.
Mi thiamte chuan BJP hian Murmu-i a chak theihna tur khawp thlawptu an nei niin an ngai.
Eptu tangrualten an vawrh chhuah, politician hlun tak, Yashwant Sinha nen an inkhing a. Sinha hi tun hma lama BJP hruaitu thin, Prime Minister Atal Bihari Vajpayee-a hun lai pawha an rinrawl niin tunah erawh saffron party leh Narendra Modi-a sawiseltu thawm na ber zinga mi a ni.
Hnehna chang zawk hian President Ram Nath Kovind-a an thlak dawn a, ani hi July 24-ah a hun a zo dawn a ni.
Murmu-i hi BJP leh an thawhpui party-ten hming 20 an chhawp chhuah zinga president chuh tura an thlan chhuah a ni.
An party-in an candidate dawna tih pawh hi television atanga a hriat niin a chanchin a hria chuan a barakhaihin a lawm hle tih a sawi.
“Hmun kilkhawr tak, Mayurbhanj district-a tribal hmeichhia ve mai tan chuan kan rama nihna sang ber chuh tura tih hi ngaihtuahnaah pawh la awm phak ngai lo a ni,” tiin candidate a ni dawn tih a hriat hnua thuthar lakhawmtuten an kawmnaah a sawi.
Odisha-a politics hruaitute chuan Murmi-i’n inthlan a chuh tur chu an lawmpui hlawm hle a, ‘kan ram leilung fanu’ tiin an sawi hlawm.
An state-a party khata a awmpui, kum 1980 chho vel atanga lo inhmehriat tawh, Kabi Vishnu Satpathy-i chuan ‘a ngaidana huai taka kal mai thin leh ni nun tlawm tak’ tiin a sawi.
“Hmeichhe duhawm tak a ni a, a thinlung a tha a, thinbutut engmah nei lo leh boruak tichhe zawnga khawsa ngai lo a ni a. A inpho chhuak ve chiam chiam ngai lo va, mipuite nen zalen taka awm bawrh bawrh thin a ni a. Politician a nihna ang pawhin mipuite enkawl dan hria a ni ang,” a ti.
Thla tharah hian president thlan dan ang bawk hian India-ah hian MP leh MLA rualten vice-president an thlang dawn bawk.
BJP chuan an hruaitu hlun tak, West Bengal governor ni lai, Jagdeep Dhankar chu an candidate dawn tih an puang chiang tawh a. Eptu tangrualte chuan Congress hruaitu hlun, Margaret Alva-i an vawrh chhuak thung dawn a, ani hi union minister pawh vawi eng emaw zat a lo ni tawh.