Barak Democratic Front (BDF) chuan Nilaini khan Silchar-ah Meghalaya-a Assam truck driver thah duh lohna lanturin a thattute chu na taka hremna pek an phut.
BDF worker-te hi martar Khudiram Bose-a lim hmaah pung khawmin duh lohna hi an lantir.
Barak Valley-a Karimganj district, Duhalia khuaa truck khalhtu hi Meghalaya-a West Jaintia Hills, Jowai-ah Thawhtanni khan thah a ni tih an sawi.
Truck driver hi Alak Das niin Duhalia khuaa Dhirendra Das-a fapa a ni.
Das-a hi FCI FSD Jowai-a a truck-a a mu lai chu mi pahnihin beiin an that niin an sawi.
An thah hnuah hian tute nge an nih hriat loh mi pahnih hian Chansari FSD-a dah tur buhfai bag 500 phur a truck chu an khalhsak zui niin an sawi.
A ruang hi an thahna atanga km nga vela hlaah hmuh a ni a, mi thah leh truck ruk thubuaiah mi pakhat man a ni tawh a. Truck pawh hi hmuh let leh tawh a ni.
Truck khalhtu thihna duh lohna lantirtute chuan, “A titua rin mi pakhat man a nih bak hi engmah a hnuah chhui zuina a awm lo,” an ti.
Duh loh lantirnaa tel, BDF chief convenor Kalparnab Gupta chuan, “Hetiang hi Meghalaya-a a thlen vawi khatna pawh a ni lo. Meghalaya-a Barak driver kalte hian hmuhsit an tawk nasa thin a. Meghalaya-a mite hian hun rei tak atang tawh khan Barak-a chengte leh Bengali-te hi ‘tum bikah’ min neih tawh,” a ti a. BDF chuan an ngaithei tawh bik lo tih a sawi.