National Health Mission Employees Union Mizoram (NEUM)-in state sorkara ngiat neia lungawi lohna lantira a huhoa ni sarih chawlh an lak hnuah nimin chawhma dar 9 khan nawrh an titawp.
Central YMA-in NEUM leh Mizoram sorkar inkarah palai hna an thawk a. Pathianni chhun khan Central YMA chuan NEUM hruaitute chu sorkara an thil ngiat chungchangte an sawipui hnuah, chawhnu dar 3:30-ah Mizoram sorkar hotute an kawm ve leh a ni.
Hemi hnu hian NEUM hruaitute chu an thu hawnte sawipuiin an kawm chhunzawm leh nghal a. NEUM Executive Committee chuan Central YMA thu hawnte ngaihtuahin an thusawi atangin sorkarin an rawtna hi a pawmpuiah an ngaih avangin nawrh an kalpui mek chu an titawp tih an puang ta a ni.
An thuchhuahah NEUM hian an aiawh, Central YMA-in sorkar hotute an biak atanga an thu hawn angin Deputy Chief Minister Tawnluia chuan NHM hnuaia thawktute dinhmun zirchiangtu, study group-in chak taka hmalak an lak mek thute sawiin, an zirchianna a chhuah hun hi sawi mai theih a nih loh thu a sawi a. September thla hma emaw, September thla hnu pawh a ni mai thei a, a hma thei ang bera tihchhuah tum mek a ni tih a sawi.
An hlawh chungchangah Health Minister Dr R Lalthangliana’n regular taka hlawh pek an nih theih nan hma lak a nih thu leh ruahmanna pawh siam mek a nih thu a sawi a. Tunah hian June thla hlawh tur pawh peih fel a nih tawh thu a sawi bawk.
Health minister hian Mizoram Essential Service Maintenance Act, 1990 (as Ammended 1995) hi Covid-19 boruak a nih vanga chhuak a nih thu leh NEUM nawrh vanga thupek chhuah a nih loh thu te, an nawrh hma atanga Covid-19 pung leh avanga tihchhuah tura file awmsa a nih thute a sawi a. He dan hi chu Covid-19 bik atana tihchhuah a nih angin notification pawh siam that a nih tur thu a sawi a ni.
Deputy Chief Minister Tawnluia pawhin NEUM rawtnaa tel lo, Show Cause Notice chungchangah, nawrh an huaihawt hi an titawp a nih chuan show cause notification hi cancel nghal a nih tur thu a sawi bawk.
NEUM chuan sorkarin health department tana theihtawp an chhuah thinte hi hriatpui ve se, hamthatna an neihte pawh tihhlawhtlinsak thuai zel turin an ngen tih an sawi.
Hetihlai hian an hlawh chungchangah health minister-in June thla hlawh tur peih fel a nih tawh thu a sawi angin, tun kar chhung hian an hlawh chu a luh fel mai an beisei thu te, MESM puan khum an nih chungchangah pawh notification siam that a nih tur thu an sawi chu nimin vek khan siam that a nih thu leh, NHM thawktuten chawlh an lak avanga insawi fiah tura hriattira sorkarin a tihchhuah pawh sut nghal a nih thu NEUM hruaituten The Zozam Times an hrilh.
NEUM hruaitute hian an thil ngiatte tihhlawhtlin kawngah sorkar chu an intiam angin hma an la chhunzawm em tih chu an thlithlai reng dawn tih an sawi a. An beisei anga hlawhtlinna an hmu lo a nih chuan hma an lak zel tur thu an sawi bawk a ni.