Premier League champion Manchester City in an player-te hralh an chhunzawm zel a, Arsenal hnenah Oleksandr Zinchenko chu Pound maktaduai 30 a hralh turin inremna an nei.
Club pahnih inremnaah hian Zinchenko khelh dan a zirin Pound maktaduai 2 an inpek belh ang.
Ukrainian midfielder hi Manchester City in tuna pre-season inbuatsaihna nei a United States a hun an hman mekah team zingah a tel a, a insawnna tifel tur hian England-ah tunkarah a kir anga, kartawp hma in a club thar a zawm tura ngaih a ni.
Manchester City-ah hian a position pangngai ni lo left-back ah chhawr a ni fova, kum 25 mi hi player rintlak tak nimahsela midfielder anga khelh chu a duh ber a nih thu a lo sawi tawh a, hemi tur hian hmun dang pan pawh a hreh loh thu a lo sawi tawh thin.
Zinchenko hi Pep Guardiola in kum 2016 a Manchester City a enkawl tan tirha player a lakluh hmasak ber zing ami a ni a. An tan inelna hrang hrangah vawi 128 inkhelin league title vawi li a lak bakah FA Cup leh League Cup vawi li a la hman..
A insawnna hi an tifel a nih chuan tun nipui a Manchester City atanga Arsenal pan pahnihna a ni dawn a. Pound maktaduai 45 in striker Gabriel Jesus chuan Emirates Stadium a lo zawm tawh.