India ram chhunga vantlang hriselna lama mi thiam chuan kum hnih vel thleng chu mipuite chu fimkhur tur leh coronavirus darh leh theihna hun siam lo turin a ngen.
AIIMS-a medicine department-a professor, Dr Neeraj Nischal-an mipui hnena thu a rawn hi India-a sakhaw hunpui a thlen dawn lai mekin a sawi chhuak.
Dr Nischal hian hri leng thawh hnihna pawh a la reh fel lo tih a sawi bawk.
“Kûtpui hi Covid ni lovin hlimna inhlan chhawnna tur a ni a. Kum hnih khat lo awm leh tur hi chu, hripui kan thunun hma zawng chu a tidarh lehtu ni lo tura kan fimkhur a ngai a ni,” tiin a sawi tih news agency ANI chuan a tar lang.
AIIMS-a professor-in mipuite hnena ngenna a siam hma lawk hian hriselna lama mi thiamte chuan mipuite chu ni 125 lo awm leh tur chhung hi hri inkai a tam lohna turin a darh lohna tura inkaihhruaina zawm tha turin an lo ngen tawh bawk.
Mi thiamte chuan mipui awm khawm tam leh sakhaw thila pun khawm awm thinte khuahkhirh a nih loh chuan hripui tai darhna bulpui a ni leh thei tih an sawi.
Niti Aayog member Dr VK Paul chuan ramin herd immunity an tih, hri leng ngaizam thei khawpa mihringin ngaia a neih hun a la thleng lo tih a sawi a, herd immunity nei thei tur khawpa kai nasat erawh a tha lo tih a sawi bawk.
Fortis Hospital director leh paediatrics department head, Dr Arvind Kumar pawhin fimkhur a ngai tih a sawi bawk a. “Thawh hnihna kha ram kang ang maiin a darh chak a, kha kha mipuiten Covid laka himna tur an zawm loh vang a ni a. Thihna tam tak a thlen a ni,” a ti.
Hri leng thawh dang a thlen lohna turin mi thiamte chuan mi dangte nena feet ruk dan taka awm te, mipui zinga awm loh te, mi zinga hmai tuam leh Covid kai lohna tura dan zam zawm thatte chu a pawimawh ber a nih thu an sawi nawn leh.
India-ah hian hri leng thawh hnihna kha a na hle a, kai leh thihpui an tam tak zet a. Mi thiamte chuan August thla tawp leh September thla tir inkarah thawh dang intan leh tur angin an sawi lawk.