Youth for Environment Justice Mizoram leh Aizawl City College Joint Students’ Union (ACCJSU) tangkawp huaihawtin zirlai thahnem takin nimin khan Aizawlah ‘Mizoram Environment humhalhna nan’ kawng an zawh a. Mizoram chhunga hmasawnna project duan a nih dawnin environment laws-in a phut tihmasa lo leh zawm loa hmalak an duh tawh lo.
Kawng zawh hi chawhma dar 11 atangin Vanapa Hall kawt atanga tan a ni a, hemi hnu hian Tuikhuahtlanga Environment, Forests & Climate Change Department office kawtah pungkhawmin environment humhalh a tul an tih thu te, nungchate thlamuang taka an awm theih lohna chu state ralmuang an tih loh thu leh thu dang hmangin an au rual.
Hemi hnuah NHIDCL Office kawtah hun hmang lehin NHIDCL-in Mizoram chhung kawng laih hna an thawh dan chu an duh loh thute, executive director chu an hnuaia contractor leivung paih dan en dik vek tura an phut thute-in an au rual leh a; hemi hnu hian Sikulpuikawnah pungkhawm lehin a kharna hun an hmang a ni.
Mizoram leilung humhalh duhtu thalai rual, kawng zawhtute hian resolution pass-in Mizoram chhunga hmasawnna project duan a nih dawnin environment laws-in a phut tihmasa lo leh zawm loa hmalak an duh tawh lo tih te, hmasang atanga Mizo hnam ziarang leh nunphung, khuarel nena inzawm tlat chu thangtharten chawi nun leh an duh thu leh lui, dil, phulhmun leh ngaw hrang hrangte hian nunna inkhaidiatah mawhphurh bikna leh dinhmun pawimawh tak an nei vek a, a nihna anga humhalh an duh thu te an tar lang.
An resolution-ah hian National Mission for Sustaining the Himalayan Ecosystem (NMSHE) hnuaia Indian Institute of Science leh Indian Institute of Technology ten Himalaya tlangdunga state awm zawng zawngte climate change-in a nghawng dan an zir chiannaah Mizoram chu heng Himalayan state zawng zawng zingah sik leh sa inthlak danglam avanga state dinhmun derthawng zinga pahnihna a ni tih leh zir chianna chuan, “Mizoram environment chuan hliampui a tuar mek a, chhe rup thei a ni,” tih a targ lan tih an sawi.
Science & technology department zir chianna, 2019-in a tar lan danin kum 15 hma lam chhunga khawvel pum lum belhna chu 0.6 - 2.5 degree Celcius a nih laiin Mizoram chu 2.75 degree Celcius-in a lum belh tih leh The Indian space Reaserch Organistaion (ISRO)-in kum 2021-a India state zinga khaw ro chak ber 10 a thlan zingah Mizoram chu hmarchhak ram zingah a khaw ro chak ber a ni tih te an resolution-ah hian tar lang bawk a ni.
Mizoram environment humhalhna kawng zawngah hian Aizawl khawpui chhunga college hrang hrang atangin zirlai thahnem tak, Mount Carmel School zirlai leh he hmalakna thlawptu mi 500 chuang an tel a ni.