Supreme Court chuan Thawhlehni khan Prophet Mohammad-a chungchang a sawi dan avanga a laka thubuai ziah luh, BJP hruaitu, Nupur Sharma-i chu man rih lo turin a ti a, venhimna a mamawh tih a sawi bawk.
Sharma-i lakah hian FIR pakua zet thehluh a awm a, ani pawhin man a nih lohna tura humna a dil ve bawk a, hei hi justice pahnih, Surya Kant leh JB Pardiwala thutna bench chuan ngaihtuahin man theih rih loh tura inhumhimna a pe a ni.
Court hian sorkar laipui leh state thenkhat - Delhi, West Bengal leh Maharashtra sorkarte chu an FIR thehluh theuhte hmun khata kalpui turin a ti bawk a. Thubuai hi August 10-ah ngaihtuah leh turin a ti bawk a. Hemi hma hi chuan Sharma-i lakah hian thubuai dang thehluh theih a ni lo bawk.
Sharma-i hian a thu sawi avang hian nasa taka beihna tawkin thah tuma vauna hial a dawng tih a lo sawi tawh.
TV-a thil sawihonaah Prophet Mohammad-a chungchang a sawi dan avanga thinrimten FIR eng emaw zat thehluh a ni.
A thu sawi avang hian ram chhunga Muslim-te an thinrimin pawl eng emaw zatin kawng an zawh a, hmun thenkhatah phei chuan tharum thawhna pawh a thleng hial.
India ram sorkar pawhin harsatna tawh phahin Muslim ramte chuan an duh loh thu nasa takin an sawi a. BJP pawhin an thupuangtu a nihna atangin an chawlh lailawktir ta hial a ni.