Aizawl: Thawhtanni khan Mizoramah Covid-19 kai mi 280 hmuh chhuah thar an ni a, ni 112 hnua ni khat thil thua hri kai hmuh chhuah tam ber tum a ni.
Kumin March 28 khan hri kai hmuh chhuah mi 248 awmin hemi hnu hian ni khata hri kai hmuh chhuah chu 200 hnuai lam zel a ni tawh a, Thawhtanni khan hri kai hmuh chhuah thar hian 200 pelin, 280 a tling leh ta a ni.
Hri kai hmuh tharte hi mipa 145 leh hmeichhia 135 an ni a. District hrang hranga hri kai hmuh thar zat chu Aizawl district-ah 100, Serchhip district-ah 59, Lunglei district-ah 54, Mamit district-ah 36, Kolasib district-ah 13, Saitual district-ah 10, Champhai district-ah pathum, Hnahthial district-ah pathum leh Siaha district-ah pahnih a ni.
Kumin January leh February thlaah Covid-19 kai thar hmuh a la tam hle a, January thlaah 33,357 hmuh a ni a, February thlaah phei chuan 39,631 hmuh a ni a, March thlaah chuan sing hnuaiah tlahniamin 9,869 hmuh a ni a, chuta tang chuan tlahniam zelin April-ah 2,931, May-ah 883, June-ah 770 hmuh a ni.
July thlaah chuan pung lehin ni 18 thlengin hri kai 1,820 hmuh a ni leh ta a. May leh June thlaah ni khata hri kai 100 chuang hmuh ni a awm lo a, July thlaah chuan ni khata hri kai 100 hmuhna ni sarih ngawt a awm tawh a ni.
Mizoramah Covid-19 kai mi 2,30,926 an awm tawh a, mi 2,29,475 an dam tawh a, mi 706 in an thih phah tawh a, nimin tlai dar 5 thleng khan hri kai enkawl lai mi 745 an awm.