Baghdad khawpui daia Thawhtannia kawngpuia bomb kam tihpuahah mi 20 vel an thi a, mi dang 35-in hliam a tuar bawk tih Iraqi security official-ten an sawi.
He beihna hi Sadr City-a bazar lun lai taka thleng a nih thu thuneitute chuan an sawi a. Eid al-Adha chawlh hma ni chiah, bazara mi an kal tam vanglaia thleng a ni.
“Baghdad khawchhak lama Woheilat Market-ah hian tualchher IED [improvised explosive device] tihpuah a ni a, thi leh hliam tam tak an awm,” tiin Iraqi interior ministry chuan thuchhuah a siamah a tar lang.
Thi zingah hian hmeichhia leh naupangte pawh an tel a, dawr thenkhat chu a kang chhe bawk.
Tute mahin an tihah an la chhal lo va; mahse, ISIL (ISIS) chuan hetiang ang beihna hi helai bawrah hian an lo thlen fo tawh.
Kumin chhunga mihring chen tamna lai hmuna bomb a puah vawi thumna a ni tawh a. April thla khan Sadr City-ah tho hian car bomb tihpuah niin mi pali an thi a. He bomb hi bazara car hun pakhata kam a ni.
Iraq-ah hian tun hnai thla eng emaw zat liam ta atang khan tharum thawhna a tlahniam nasa hle a, hei hi hripui lengin a nghawng pakhata ngaih a ni.
Boruak muanawm tak hnuaiah erawh an la awm lo va, IS firfiak pawlte an la awm reng a, tharum thawhna liantham thlen tam rih lo mah se an insiam lian leh ang tih hlauhthawnna a awm a, hmun hrang hrangah an inzar pharh leh tan mek tawh a ni.