Aizawl: Chief Minister Zoramthanga chuan Mizoramah zu leh ruihhlo dang avanga a hun loa nunna chân an tam thu a sawi.
Tun hnaia mipui hmaa thu a sawina apiang deuhthawa ruihhloin Mizoram a tihbuaizia a vei sawitu, Zorama chuan nimin khan Govt Aizawl North College (GANC) zirlai hmaah ruihhlo chungchang hi a sawi chhuak leh a, “Zu avangin thalaite atanga kum upa zawkte thlengin a hun loa nunna chân an tam,” a ti.
Chief minister chuan veng tina branch YMA-te hian zuin a tihhlum list hi la khawm ta se en ngam pawh a nih loh tur thu sawiin, zu bakah ruihhlo dang avang pawhin Mizo thalai tam tak an thi tam hle tih a sawi a. Ruihhlo avanga talbuai an tam avangin chung mite enkawlna hmun buatsaih kawngah sorkarin beihpui a thlak a, sum tam tak sengin ngawlvei hrang hrang enkawlna hmunhmate a ruahhman tih a sawi.
GANC-in Electric Veng YMA Hall-a Freshers Social cum Felicitation programme an hmannaa zirlaite kalkhawmte chu anmahni leh an chenpuite, khawtlang leh ram tan mi chhenfakawm ni tur chuan nun uluka ruihhlo chi hrang hrang laka fihlim a pawimawh thu chief minister hian a hrilh bawk.
He hunah hian GANC zirlai atanga MZU rank holder palite hnenah lawmpuina hlan an ni a, Principal Prof. S. Haukhanlian Mate-in thu sawiin zirlai tharte chu zirlai an nih laiin hun hlimawm hmanga zirlaiah theihtawp chhuah turin a fuih.
Nimin vek khan Chief Minister Zorama chuan Aizawl College-in Vanapa Hall-a Freshers Social an hmanna a telpui bawk a. He hunah hian zirlai zirna lamah leh infiamna lama tithate hnenah Academic Award leh Sport Award hlan a ni.