India ramah kum 2020 chhung khan kawngpuia chetsualna thleng avangin mi nuai 1.5 an thi a, ram 207-a thihna thleng zinga 26.37% zet a tling.
Union Road Transport & Highways Minister Nitin Gadkari chuan Nilainia parliament thutkhawmah International Road Federation, Geneva-in World Road Statistics (WRS) a siam behchhanin India-a lirtheia chetsualna thleng chung-chang hi a sawi.
India ram hi khawvel pumah lirtheia chetsualna thlen tamna ram zinga mi a ni reng a. Kum tin chetsualna vawi nuai tam tak thleng chhinchhiah a ni a, heng hian mi tam tak nunna lain hliam tuar an tam thei hle bawk.
Lirtheia chetsualna thleng hian mi tam tak ramtuileilovin a awmtir a, chhungkaw dinhmun thlenga benghniamin ram eibar dinhmun leh sum thawh chhuah thlengin a tawrh phah.
Sorkar laipui chuan kawngpuia lirthei chetsualna thleng hi tihtlem tumin hma a la reng a, Motor Vehicle Act hmangin lirthei khalhtute chu lirthei kal vel dan zam bawhchhia hremna a siam a, kawngpui lianah lirthei chesual a tamna lai hmun (black spot) siamin lirthei khalhtute fimkhur nan chhinchhiahna a siam thin bawk a. Lirthei laka fimkhurna tur inzirtirna hrang hrang a kalpui reng bawk.
Parliament inkhawlah hian zawhna dang chhangin Gadkari chuan ministry-in toll road hrang hrangah Build-Operate-Transfer (BOT) hnuaia inremna neih a tawp tawh hnu pawha pawisa laksak ching an awm thu an dawn thu a sawi.
“National Highways Authority of India (NHAI)-ah All India Motor Transport Congress leh Kolhapur District Lorry Operators Association atangin kawng hman man pawisa laksak thin hi complaint dawn a ni,” a ti.
Minister chuan June 30, 2022 thleng khan BOT operator-te chuan fee plaza 214-ah kawng hman man an chawi an khawn tih a sawi a, hei hi NHAI nena inremna neiin man tlawm zawka khawn a ni tih a sawi bawk.