Project Sunshine hmalaknain nimin khan Kolasib-ah ramri kâna HIV tai darh dan zirchianna neih a ni a, he huna an tar lan danin kumin January atanga June, thla ruk chhungin Kolasib district-ah HIV vei mi 43 hmuh chhuah a ni.
January atanga June thla thleng khan Kolasib-a Integrated Counselling & Testing Centre-ah mi 1,960 thisen endikah mi 43-in HIV hrik an pai tih hmuh chhuah a ni.
Sorkar kum liamta, 2021-22 chhung khan Kolasib district-ah hian mi 3,720 thisen endikah mi 107-in HIV hrik pai tih hmuh a lo ni tawh bawk a ni.
Nimina I&PR Conference Hall-a inkawmhona neih hi SHALOM Chief Executive Officer Dr. Chawnglungmuana’n a kaihruai a, ‘Project Sunshine’ hnuaia ruahmanna awmte sawi zauin ‘Cross Border Intervention’ bik hi Zokhawthar, Kanhmun leh Vairengteah kalpui a nih tur thu a tar lang.