Khaw lum uchuak tak karah Europe khawthlang lam ramte chuan ram kang thelh hna hautak an thawk mek a, hmun tam takah a lum ber tum record thar a thleng nual bawk.
Khaw lum leh vawt uchuak ngai lo, UK-ah meuh pawh a vawi khat nan 40°C a kai.
Germany-ah chuan kumin chhunga a lum ber ni tawngin Portugal-ah khaw lum lutuk avanga thi an pung mek bawk.
Khawmualpui hmun hrang hrangah ram a kang a. UN hnuaia World Meteorological Organization (WMO) chuan dinhmun chhe zawkah an la luh belh thei tih a sawi.
Sik leh sa inthlak nasa lutuk avangin khaw lum uchuak tak hi a reiin a na tawlh tawlh a, a hun tur sawi lawk a har telh telh bawk.
WMO chief Peterri Taalas chuan, “Nakinah chuan hetiang khaw lum lutukin a nih dan pangngaiah kan la ngai ang a, khaw awm dan uchuak tak tak kan la tawng zel dawn a ni,” a ti.
UK-ah chuan khua a lum em em karah fire services-te chuan kangmei chhuak avanga kohna an dawng mawlh mawlh bawk.
London khawchhak lam, Wennington-a ram kang chuan chenna in a kang chhe nual a. Hmun hima suan chhuahte chuan in pariat vel leh biak in a kang chhia niin BBC hnenah an sawi a, a thelh hna thawktu, kangthelh pawl chuan ‘meidil ang’ tiin an sawi.
France-ah chuan Thawhtanni khan hmun 64 zetah an huam chhung theuhva a lum ber ni an tawng hlawm.
Ram laili lamah erawh chu tlemin an dinhmun a ziaawm deuh va, hetih lai hian chhimthlang lamah chuan kum 30 chuang hnua ram a kan nasat ber tum an tawng mek a. July 12 hnu lam atang khan grape chin tamna, Gironde region-a ram hectare 20,300 chuang a kang chhe tawh.
Mi 37,000 dawn an in atangin hmun himah chhuahtir an ni.
Hetih mek lai hian UK leh France-ah hian khaw lum lutuk hi ziaawm leh hret tawhin a boruak a dai leh deuh tawh.
Belgium-a chawlh hmanna hmun, De Haan-ah kangmei chhuakin lirthei eng emaw zat a kang a; mahse, khaw lum tak an tawrh hnuah ruah a sur leh tawh a, hmun thenkhatah chuan ruah mm 20-30 vel an dawng niin Le Soir chanchinbu chuan a tar lang.
Khaw lumin hmar leh khawchhak a tuam tan mek laiin Germany-ah pawh inralrinna khawn a ni.
Thawhlehni khan kuminah a lum ber tum an tawng a. National weather service chuan khawthlang lam, Duisburg khawpuiah chuan 39.5°C a ni tih an sawi.
Netherlands-ah pawh Maastricht-ah chuan 39.5°C a ni ve bawk niin khawchin zirtute chuan an sawi.
Portugal-ah chuan khaw lum lutuk a ziaawm deuh tawh a; mahse, kar hmasa atang khan khaw lum vang hian mi 1,000 chuang an thi.
Khawchin zirtute chuan Nilaini atanga Zirtawpni thleng khan Italy-ah chuan 40-42°C a ni thei dawn tih an sawi.