- Ruata
French lirthei siamtu Citroen chuan Tata Punch leh Maruti Suzuki Ignis te nena inel thei tur, an lirthei thar C3 chu an tlangzarh ta a. Ex-showroom manin Rs. Nuai 5.71 – 8.06 man inkar a ni dawn a ni.
Citroen hi sawi tawh angin France ram companylar tak a ni a, khawlvel huapin lirthei changkang leh mawi tak tak an siam chhuak mek a ni. Citroen C3 hi India rama lirthei an hralh tam tura an ngaih a ni a, thla hmasa atanga book theih tawh kha a ni a, dealership hrang hrangah leh an company website-ah te Rs. 21,000 chawiin a book theih tawh a ni. He lirthei hi a huang ang zawnga thlir chuan hatchback lian lam, khawvel market tam taka micro-SUV an tih ang chi a ni dawn a. Hei hi SUV huangah chuan a te ber te pawh a tih theih ang a, Tata Punch te nena huang khata awm thei tur a ni dawn a, Suzuki Ignis pawh hi khawvel huap chuan micro-SUV anga ngaih a ni.
A khawl tur
Citroen C3-ah hian petrol khawl pahnih duhthlan tur a rawn awm dawn a. Pakhat hi 1.2-litre, three-cylinder naturally aspirated engine niin 82hp power leh 115Nm torque a pechhuak thei ang a, 5-speed manual transmission a nei dawn bawk a ni. A dangleh hi 1.2-litre vek, three-cylinder turbo-petrol a ni thung dawn a, hei hian 110hp power leh 190Nm torque a pechhuak thei dawn a, 6-speed manual gearbox a nei dawn bawk a ni. Heti anih chuan Citroen C3 hi a elpui te nena khaikhinin a chak bik dawn viau a, chutihrualin tunah rih chuan automatic transmission a nei lo bik dawn a ni.
A chhung, pawn leh kentel
Design lamah chuan Citroen C3 hian an company ebut model C5 Aircross model a rawn tawm dawn viau a, a mawi dawn viau a ni. A design-a kan hmuh tur zingah hian colour-coded inserts a bumper-ah kan hmu ang a, split headlamp a grille nena inchawih mawi tak, hexagonal air dam, X-shaped faux scuff plate, all-round black cladding ( Feel trim bikah), wraparound tail-lights leh thil hrang hrang kan hmu dawn a ni.
A chhung design theme pawh Citroen lirthei dang angin a rawn mawi dangdai leh viau mai a. Dimpled-effect dashboard panel a tih chu orange leh anodised grey colour te duhthlan tur a awm dawn bawk a ni. A pawn mai bakah a chhung hi a mawi a, India rama a man rualpui lirthei kan hmuh tam tak aiin a danglam bik zar a ni.
Citroen C3-ah hian 10-inch touchscreen with wireless Android Auto and Apple CarPlay, digital instrument cluster, manual air conditioning, four-speaker sound system, front and rear USB charging ports leh adangte kan hmu ang a. Himna lamah pawh dual airbags, rear parking sensors, seatbelt reminder te kan hmu tel dawn bawk a ni.
Citroen C3 hi monotone colour chi 4 leh dual-tone colour chi 6 duhthlan tur a awm dawn a. Customisation pack chi thum a awm ang a, hengte hi orange, grey leh chrome inserts te a ni dawn a, he rawng an zehluhna tur hi a hma bumper fog lamp housing, a hnung bumper, side body cladding leh wing mirror cap-ah te a ni.
Mizoramah lirthei chhuak thar apiang hi kan hmu ve ta deuh zel mai a. Citroen lirthei hi India ramah a la chhuah tam loh avangin kan la hmu vak lo a, hetihrual hian company lam chuan India ram state hrang hrang hi an lirthei man to lutuk lo, C3 hmang hian tuam chhuah an tum ngei dawn niin a lang a. Foreign company lirthei mawi leh tha tak tak kan state chhunga kan hmu ve nual tawh karah hian French company hmingthang Citroen lirthei pawh hi kan hmuh veleh thuai mai a rinawm a. Lirthei lian lutuk lo, mawi leh tha bawk si a ni dawn a, Mizoramah pawh hawlchhuah nuam tak tur tawk vel a ni dawn a ni.