Argentina forward Paulo Dybala chuan hun engemaw chen a hma hun chungchanga inrinsiakna a awm hnuah free transfer in AS Roma a zawm.
Kum 28 mi hian June thla khan Juventus a contract a neih chu a hmang zo a. Rome-ah hian kum thum contract ziakin Jose Mourinho hnuaiah a inkhel tawh dawn.
Turin club-ah a cham chhungin an tan vawi 293 a inkhel hman a, goal 115 a khung. Juventus hi kum 2015 khan Palermo atangin a zawm a, an hnenah Serie A title vawi 5 a chawi hman.
“He contract ziah a nih hma hun engemaw chen chhung kha chu rilru ah thil tam tak a awm hman a. Mahse Roma in min lakluh duh a thil engkim an tifel zung zung mai khan ka rilru ah thu a sawi.”
“He team hi chung lam pan mek an ni a, hmalam hun atana inbuatsaih nghet tak niin Jose Mourinho hi thawhpui chakawm tak a ni.” a ti.
June thla khan Inter Milan chief executive Giuseppe Marotta chuan Dybala hi an biak thu a lo sawi tawh a, inremna a awm loh hnuah English club ten ngaihven leh mahse inbiakna a tluan tling lo leh bawk.