Sri Lankan MP-te chuan an ram mipuitea tla na lo tak ni mek, Prime Minister Ranil Wickremesinghe chu an president thar atan an thlang.
Wickremesinghe-a hian hmabak ko tak a nei dawn a, thla eng emaw zat sorkar kalphung duh lohna lantira mipui an inhawr khawm hnuah an ram eibar dinhmun tluchhia tun din a ngai dawn.
President ni tur hian a khingpui, Dullus Alahapperuma-a chu a hneh a, parliament-ah vote 134 hmuin pakhatin 82 a hmu.
Sri Lanka-ah hian president tang lai, Gotabaya Rajapaksa chuan kar hmasa khan an ram mipui lungawi lohna lantir tlanchhiatsanin an ram a chhuahsan.
Maldives a pan hnuah Singapore-ah a kal leh a, a hma lawkin mipuiin a chenna leh sorkar building an luhchilh a, bâng turin an nawr.
Politics-a Rajapaksa chhungkua nena inkungkaihna thuk tak nei a nih avangin Wickremesinghe-a pawh hi bang tura an nawr tho a ni a, May thlaa prime minister atana ruattu pawh Rajapaksa hi a ni.
Kar hmasa khan mipui thinrimin a in an halsak a, Colombo-a a prime minister pisa an suasam bawk.
Nilainia inthlanah a tling tih an hriat chuan mipuiin pawi an ti a, an hmabak chu a ngai tho a nih an ring hlawm.
“Inthlan result hian min tihreawm tak zet a, kan MP 134, mipuite aiawhtute hian keini mipuite duhna hi engah mah an ngai lo a ni,” tiin mi pakhat, Jeana De Zoysa chuan BBC a hrilh.
Wickremesinghe hi vawi ruk zet prime minister lo ni tawh niin president inthlan a chuh tawh vawi hnihah a tling zo lo ve ve a. Nilainia a tlin tak avang hian tuna president hun kal mek, November, 2024 thleng nihna a chelh ang.
Rorel lai, Rajapaksa kaihhruai party thlawpnaa a tlin hnuah hian mipuite inpumkhatna tur leh thuneihna pawh a semzai zawnga a kalpui tur thu a sawi.
Parliament-a thu a sawiah an ramin hun khirh tak a tawh mek thu leh an hmaa chona lian tak a awm thu a sawi.
Tar lan tawh angin Sri Lanka hi sum lamah nasa taka tlachhiain ni tin mamawh - ei tur, tuialhthei leh thil dang an tlachham nasa hle.
Wickremesinghe-a hian an ram rorelna sawh ngheha an harsatna pui tura International Monetary Fund (IMF) atanga sum pawh chhuah theih a inbeisei.
Thla hmasaa IMF dawrnaah pawh khan a lo tel tawh a, rorel lai, Sri Lanka Podujana Peramnua (SLPP) party chuan an ram eibar dinhmun siam tha leh tura theihna a neih avangin an member tam zawkin an thlawp niin an sawi.
“Ranil Wickremesinghe chiah hi tawnhriat nei tha niin kan ngai a, kan eibar buaina ching fel tur hian tih dan hmang hre awmchhun a ni,” tiin General Secretary Sagara Kariyawasam chuan Reuters news agency a hrilh.
Hetih lai hian mipuiten an pawm ve dawn em tih chu a la hriat loh va, an ram roreltuten an ram an tihchhiata an kal dan hmangah thuk taka inrawlh veah an ngai hlawm tlat a ni.
Nilainia parliament-a inthlanah hian venhimna khauh taka siam niin sipaite chu building vengin an hual vek a ni.
Wickremesinghe-a’n a hneh tak, Alahapperuma hi rorel lai party atanga chhuak, eptuten an thlawp a ni a. A tling a nih chuan party bik sawi lova party hrang hrang nen sorkar siama an dinhmun siam that lehna tura hmalak tiamtu a ni.