Champhai leh Hnahlan winery-a sawr turin tunlai hian grape rah lei mek a ni a, nimin khan thahnem tak lei leh a ni.
Champhai Grape Growers Society (CGGS) hruaitute hnen atanga thudawn danin, nimin khan grape rah an lei chhunzawm a, society member mi 50 hnen atangin quintal 120 vel an lei leh a, kg-ah Rs 60-in an lei a ni.
July 13 khan grape chingtu mi 29 hnen atangin grape rah kg 6,757.65 an lei tawh bawk a, hemi tuma grape an lak zawng zawng hi Rs 4,05,458 man a ni.
CGGS hruaitute chuan kuminah khua a thal rei avangin grape chingtuten a hun takah ruahtui mamawh an hmu lo va, hemi avang hian nikum aiin thar chhuah a tlem deuh tura an ngaih thu an sawi a, August thla chu grape rah thar vanglai a ni tih leh la lei chhunzawm zel an tum thu an sawi.
Hnahlan Grape Growers & Processing Cooperative Society (HGGPCS) pawhin sawr tur grape rah an lei mek a, nimin khan kg 2,126 an lei belh a, kumina an lei tawh zawng chu quintal 918.85 a ni a, kg khat Rs 60 zelin an lei a ni.