AIZAWL: Ningani khan agriculture department buatsaihin Agricultural Machineries & Under Sub-Mission on Agricultural Mechanisation (SMAM) hnuaia kuthnathawktute hnena semchhuah tur tractor leh khawl dangte vai liam chu Agriculture Minister C. Lalrinsanga’n hmanpuiin, “Sorkar tanpuina beisei miah loa intodelh duhna avanga tha leh zung tam tak seng duh an awm zel hi a lawmawm hle a ni,” a ti.
Minister hian leilehna atan chauha hman tur ni lo, fu leh thlai dang herna tur hmanraw changkang zawk nei tura hmalak mek a nih thu a sawi a. Buh phun leh sengna khawl pawh chah thlen a ni tawh thu leh, a tul ang zela neih belh dan dap mek a nih thu a sawi.
Hun hmasa lamah intawm tura semchhuah tractor leh khawl thenkhat, mi mal ta emaw ti an awm thin chu dan kalh a nih avangin an remti ve lo tih a sawi a. Tun sorkarah hian power tiller sang chuang semchhuah a nih tawh thu te, leilet zawl zau tawk tak siam tawh a nih thu te a sawi bawk.
He hunah hian tractor/khawl dang 25 kuthnathawktu intelkhawmte hnenah sem a ni a. Sem leh zel tura ruahhman a ni a. Farmer zau khat enkawltute hnenah an intawm atana sem chhuah a ni.