Philadelphia 76ers free agent star James Harden chu a team ngaiah a khel chhunzawm dawn a, kum hnih contract thar, Dollar maktaduai 68.6 mantu a ziak a. 2023-24 season hmang tluan tura duhthlan theihna a nei nghal.
He contract-ah hian Harden hian tun season lo awm turah Dollar maktaduai 33 a hlawh dawn a, season lehah Dollar maktaduai 35.6 a hlawh thei dawn. A season hnuhnung zawk erawh a duhthlanna a ni dawn a, hman loh a thlan chuan free agent a ni leh anga, contract thar a duhna team-ah a ziak leh thei ang.Thuk zawkin
Kum 32 mi Harden hian contract a neihlaiah season tharah Dollar maktaduai 47.4 hlawh thei tur a ni a, mahse hei hi a duhthlanna niin hman loh a thlang zawk. He thutlukna a siam chhan chu 76ers in player tha dang an lakluh theih zawkna tur a nih vang a ni a. 2022-23 season atan hlawh tih tlem zawk a thlang.
NBA dana salary cap hnuaiah 76ers in team siksawi turin hma an lak theih phah a, free agent ni mek P.J. Tucker leh Danuel House te contract an pek theih bakah Memphis Grizzlies nen trade in De'Anthony Melton an lalut thei bawk.
NBA season khat chhunga player tha thlanchhuah - All NBA team a vawi ruk lang tawh Harden hian Sixers president of basketball operations Daryl Morey hnenah team tha an dinna turin hlawh tlem zawk lak a duh thu a hrilh thu a sawi a. “Daryl nen kan inbia a, kan team a mamawh ang player chu dap khawm la, chumi a bang chu min pe dawn nia ka ti. Ka duh ber chu champion nih hi a ni.” tiin a sawi.
Thla thar a kum 33 tling tur Harden hi NBA All-Star vawi 10 ni tawh hi February 10 khan Brooklyn Nets chuan Philadelphia 76ers hnenah hian an trade a. Ani in Brooklyn chhuahsan a duh a, 76ers in an team chhuahsan duh Ben Simmons bakah midang Seth Curry leh Andre Drummond te bakah NBA Draft a first round a thlan theihna pahnih an pe tel bawk. Tun season liamta khan 22 points leh 10.3 assists average a nei.