Aizawl: Mizoram chhunga HIV darh zel tur venna kawnga hma la dun turin Mizoram State AIDS Control Society leh Central YMA-in thawhhona thuthlung an ziak.
Thawhhona thuthlung hi MSACS Project director pisaah ziah a ni a, MSACS aiawhin Project Director Dr. Lalthlengliani leh Central YMA aiawhin President R Lalngheta ten hming an ziak a ni.
Hemi chungchanga thuchhuah an siamah MSACS chuan data atanga a lan danin HIV hi Mizoram mipui nawlpuiah nasa takin a lut tawh a, hengah hian inngaizawngte inkarah sex hman atang te, nupa inrinawm lohsanna avang te, tun hma lama kawppui (ngaihzawng emaw nupui/pasal) hmasa atanga lo kai tawhten a hnua an kawppuite hnena an kaite an tam hle tih an tar lang.
HIV hrik pai zinga a tam ber chu thalai kum 15 atanga kum 49 inkarte an ni a, hetiang zela thalaite zingah HIV a darh zel chuan khawtlang leh ramah heng nghawng tha lo tak tak - hnam inthlahpung chak lo, thalai hnathawk turte hrisel lo te, ram hmasawnna tur nasa taka tlahniam te, chhungkua, khawtlang leh ramah retheihna nasa tak leh fahrah leh khawtlanga harsatna nasa takte Mizoramin a la hmachhawn thei tih an tar lang a ni.
MSACS leh Central YMA-in thawhhona an neih kaltlang hian district-ah leh thingtlang lam zawkah te nasa taka hmalak tum a ni tih an thuchhuahah chuan an tar lang bawk.