Defence Research & Development Organisation (DRDO) chuan ama puala a siam chhuah, mihringin a ken mai thei tank kahna, anti-tank guided missile chu hlawhtling takin a enchhin.
He thil hi Indian Army tana thil tangkai tak tur a nih thu a sawi bawk.
Zangkhai tak, kah nuam bawk si, kah dik bawk si missile hi mihringin a ken mai thei kah chhuahna (launcher) hmangin kah chhin a nih thu DRDO chuan a tar lang tih news agency ANI chuan a tar lang.
Missile hian a tum tak, tank hluihlawn tawh chu chiang taka fuhin a kap chhe vek niin DRDO chuan a sawi a. “Enchhinna hi hnai têa kah chia kalpui a ni a, a hlawhtling hle,” an ti.
“Tum ang takin thil a kaltluang vek a. Missile hi hla vak lo kap fuh tura enchhin a ni tawh a, missile hi infrared imaging seeker nena thiam niin tun laia hmanraw changkang thei ang bera duan a ni,” tiin DRDO hian a sawi.
Missile kahna hmanrua pawh hi mihringin a ken mai theih tho a ni.