An pawl chhung buaina avanga court thubuai neia ruahman lawk hmasaa inthlanna an neih theih loh hnuah nimin khan MHIP General Headquarters office bearer thlanna neih a ni a, president atan Ngurmawii Sailo, Kanan Veng thlan a ni.
MHIP General Headquarters hruaitu thar thlanna hi kumin April 28-a neih tura ruahman a ni a, hetihlai hian an pawl chhung buaina avanga headquarters hruaitute court-a khin an nih avangin inthlan theih a ni ta lo.
Court-in MHIP enkawl tura a ruat, administrator, Taxation Joint Commissioner Lalthansanga hona hnuaia thla tam an awm hnuah nimin khan general assembly leh hruaitu thar thlanna chu Vanapa Hall-ah an nei.
Kum 2021 atanga 2025 inkara MHIP hruaitu tura thlante chu - president-ah Ngurmawii Sailo, vice president-ah B Sangkhumi, general secretary-ah Lalliani, asst. secretary-ah F Lalramliani, treasurer-ah K Lalliantluangi leh fin. secretary-ah PC Chuaudingliani te an ni.
MHIP General Assembly hi hun hnihah thenin chawhma inkhawm hi administrator-in a kaihruai a, kum 2019 atanga 2021 inkara general headquarters hmalakna leh sum dinhmun ngaihthlak a ni a, kum 2021 atanga 2023 chhunga sum hman tur ruahman sawiho a nih bakah Art & Culture department-a Joint Director Carol VLMS Dawngkimi’n Mizoram puan chi hrang hrang, Mizo puan GI humhalh chungchang zirtirna a pe a ni.
Kum 2019, April 17-18 chhunga MHIP General Assembly an neih tum khan inthlan tur chungchangah thubuai thehluh a awm avangin inthlanna kalpui theih a ni tawh lo bawk a, khami hnu khan hruaitu insiam remin an kal tluang tan tihah Covid-19 leng avangin hruaitu thar thlang loin, chanvo chelh mekte hun pawh sei a ni.