Juventus chuan Brazilian defender Gleison Bremer chu an thenawm club Torino hnen atangin Euro maktaduai 41 in an lalut.
Kum 25 mi hian Bayern Munich lam pantu Netherlands international Matthijs de Ligt a thlak dawn a, Allianz Stadium-ah kum nga contract a ziak.
Turin khaw club pahnihte hi Bremer chungchangah hian hun tunhnaiah inbiakna an nei a, nikum a che tha tak defender thahrui ngah hi Inter Milan pawhin an ngaihven hle a. Nimahsela Juve in De Ligt an chhuahtir hnuah hun khawhral lovin hmanhmawh takin an tifel nghal.Tunge Bremer?
Defender palian leh che rang, boruak a rintlak tak ni bawk Bremer hian Brazilian club Atletico Mineiro-ah bul a tan a, an tan vawi 33 a inkhelh hnuah kum 2018 khan kum 21 mi niin Torino hi a zawm a. A season hmasa berah first team tan vawi 5 a inkhel a, Emiliano Moretti leh Koffi Djidji te thachhangdawltu a ni.
A season leh atang erawh rinrawl a ni zui nghal a, Turin khaw club tan hian inelna hrang hrangah vawi 110 inkhelin goal 13 a khung a. Season liamta khan Serie A Defender of the Year a thlan a ni tawh.Ramsey an hruai ve lo
Juventus hi United States-ah pre-season inbuatsaihna nei turin an zinchhuak tawh a. Hetah hian an midfielder hlawh hnem Aaron Ramsey chu an hruai ve lo.
Kum 31 mi Wales midfielder hian kum 2019 khan free transfer in Italian club hi a zawm a, an hnenah hian kar khatah Pound 400,000 vel a hlawh nia sawi a ni a. Juve-ah hian khelhna hmun a chan loh avangin season liamta chawhnu lam kha Scottish club Rangers ah khelh tir a ni tawh.
Juve-ah hian kum khat contract a la nei a, club nen hian a chhuah theihna tura inpek tlak dan an dap mek.