Richter Scale-a magnitude 4.1-a na lirnghingin nimin khan Meghalaya leh a thenawm, Assam chu zing dar 2.10-ah a sawi.
National Center for Seismology (NCS) pawhin hmarchhak state pahnih lirnghingin a sawi thu hi a puang.
NCS hian Twitter-ah lirnghing hi Latitute 25.88 leh Longitute 90.34-ah, lei hnuai km 10-a thuk atanga intan a nih thu a sawi.
A intanna tak hi Meghalaya-a West Garo Hills district chhung, Tura khaw hmarchhak lam km 42 vela hla a nih thu an sawi bawk.
Nimin zinga lirnghing hian thihna leh thil tihchhiat a nei lo nia hriat a ni.
India hmarchhak hmun hrang hrang hi tun hnaiah lirnghing lian tham lem lovin a sawi zing ta hle.
Thawhtanni tlai dar 6:19 khan magnitude 3.2-a nain Sikkim a lo sawi tawh.
He lirnghing hi lei hnuai lam km 10 vela thuk atanga intan a ni a. An state khawpui, Gangtok hmar lam km 6 vel chauhva hla atanga intan a ni.
Kar kal ta Zirtawpni zing dar 8:39 khan magnitude 3.6-a nain Assam a sawi bawk a. He lirnghing hi lei hnuai km 10-a thuk atanga intan a nih thu NCS chuan a sawi.
A intanna hi Sonitpur district chhimthlang lam, Tezpur atanga km 40 vela hla niin an sawi.