Sorkar laipuiin mi mal leh company hnuaia thawk pension nei lote tana pension scheme a duan, Atal Pension Yojana (APY) chu Mizoramah ngaihsak a hlawh tawk lo.
He scheme hi unorganized sector-a hnathawk pension nei lote tana duan a ni a, APY hnuaia inziak lutte chuan an sum thawh dan azirin kum 60 an tlin hnuah pension, thla khatah Rs 1,000 atanga Rs 5,000 thleng lak theih a ni.
He scheme hi India khua leh tui kum 18 atanga kum 40, saving bank account nei, private bank leh SBI bakah post office-a account neite tana zawm theih a ni.
The Zozam Times-in bank thenkhat hotute a kawm kualte chuan APY scheme hi Mizo mipuiten an ngaihsak tawk lo a, inziak lut pawh an tam lo hle tih an sawi.
He scheme thatzia leh a inziah luh danah bank hrang hrangten zirtirna an pe tha tawk nia an ngaih thu sawiin, scheme thatna hi Mizo mipuite hian an man pha lo nia an ngaih thu an sawi.
Bank hrang hrang hotute chuan he scheme hi pension nei lo tan chu thil tha tak a ni a, mi a tam thei ang berin dil se an duh thu sawiin, “APY dil tur hian bank emaw, post office-ah an account neihna hmunah dilna ziakin, Aadhar no. peka zawm theih mai a ni,” an ti.
Hma lam hun thlir chunga pension nei loten zawm ngei se an duhsak thu an sawi bakah sum dah luh tur pawh a tam loh thu leh an kum azira dah tur zat a awm thu an sawi bawk a ni.
Kum 2015 khan BJP kaihhruai NDA sorkar chuan APY hi hnathawktu mi rethei zawkte an hna atanga an chawlh hnua pension an lak ve theihna tura duangin, an tlangzarh a, a scheme hming hi prime minister hlui, Atal Bihari Vaypayee hming chawia sak a ni.