Mi sualten Nigeria hmarthlang lama hmeichhia leh naupang 100 an hrente chu thuneituten an chhuah ta a, nu tam zawk hi nau hnute pe lai an ni.
Heng mite hi Zamfara state-ah June 8 khan ruk bo an ni a. An zinga pali chu an thah nghe nghe.
Zamfara state sorkar chuan tlanna engmah pe lovin chhuahtir an nih thu an sawi a, a bak engmah an sawi zui lo thung.
Damdawi thiamten an dinhmun an endik ang a, kawm an nih hnuah an in theuhvah hawtir an ni ang.
Tun hnaiah helai bawrah hian mi ruk bo hi a hluar thar hle.
December, 2020 hnu lam atang khan mi 1,000 chuang ruk an ni tawh a. A hnuah chhuah leh mai thin an ni a; mahse, tlanna sum pek thin an ni a. Thenkhat chu thah an ni thin bawk.
Thuneitute chuan mi sual pawl (bandit) te, ralthuam nena chea mi rawk thin te, ran vulhtu te leh ralthuam nena hela che thinten pawisa an mamawh avangin hetiang hian an ti thin niin an sawi.
Kum 2014-a Borno state-a Boko Haram Islamist hel pawlin Chibok secondary school zirlai naupang 276 zet an ruk hnuah khan a hlawma zirlai ruk bo pawh a lar hle.