Aizawl : India ram zalenna kum 75 na lawmna kal zelah India-in zalenna a sualnaa tel Darthawma Renthlei (L) leh RK.Lalhluna, Padma Shri Awardee te chu Lungleia DRDA Project Director M.Misael-a pisaah nimin khan chawimawina hlan an ni.
Chawimawina hlannaah hian M.Misael chuan India ram zalenna lawmna kal zelah India ram ah District 75 thlanchhuah ah Lunglei a lang ve chu freedom fighter leh Padma Shri Awardee te vang anih thu a sawi a, Lunglei in hetiang mi chhuanawm a nei chu lawmawm a tih thu a sawi.
Darthawma Renthei (L) hi kum 1920 khan Pukpui khuaah a piang a. November ni 27, 1940 ah British Army a zawm a. Kum 1941 khan Malaysia a thawn zingah telin kum 1942-a Japan leh British sipaite chu Prisoner of War-a man zingah a tel a, Jail atanga a chhuah hnuin Indian National Army a zawm a, man niin kum 1946 ah chhuah zalen a ni.
India ramin zalenna a hmuh hnuah Freedom Fighter of India ah pawm a ni a, India zalenna sualtute tana siam Tamrapatra Award chu August ni 15, 1973 khan hlan a ni.
Darthawma Renthlei (L) hi Lunglei Chanmari ah a nupui fanau te nen chengin July ni 21, 2019 khan a boral a ni. Chawimawina hi Darthawma chhungte hnenah hlan a ni.
He huna chawimawi RK.Lalhluna, Padma Shri Awardee chuan a chanchin tawi sawiin he huna a tel ve chhan pawh Freedom Fighter te zar liau liau a nih zawk thu a sawi a, India ram zalenna lawmna pual a chawimawina a dawng chu thinlung takin a lawmawm a tih thu a sawi bawk.
RK.Lalhluna hi Mizo te tan a thu leh hla lam a thawh hlawk tak a ni a, kum 1991 khan Padma Shri Award hi dawngin tunah hian kum 84 mi niin Lunglawn Lunglei ah a khawsa mek a ni.